اشتغلت الاغاني وقاموا البنات رقص على انواعه .. هي ماكانت تدري ان هاليوم بيجي , هي رافضته بكل جوارحها .. هالمره هي اللي تعيش هالموقف .. مع انها كل ماحلمت بهاليوم .. تنفض راسها وكأنه فعلا حلم ,, ماتبي تتخيل اصلا ..!

..... عصبت برجفه : هنوف لأ والله ترا بقوم وبطلع

ضحكت : يالخبله بيلبّسك قدامهم شفيها ؟ نبي نصوركم

...... ارتبكت : قدام هالشعب كله ؟ حتى البزارين والشغالات ؟ معليييييييييش لأ

.... : تبين يعني انتي وياه لحالكم مثلا ؟

انفجعت زياده : لا والله ؟ خلاص ماله داعي بس هو وانا وماما ..وامج وامه طيبه .. ماله داعي كل الناس تتفرج

..... ماعرفت تتصرف : كيفك والله امي طيبه مارح تخليك

..... : احسن بقوم الحين وافشلكم

..... رصت على يدها : اجلسي خلاص بكلم امي اشوف

مشت الهنوف من عند ولاء وهي تراقبها .. شوي رجعت وهي تهز راسها يعني مافي فايده منكم : حتى عبد الملك يقول محنا تلفزيون .. مالت عليكم ثنينكم

ابتسمت بانتصار ... : هذا اللي بقى بعد

مشوها للغرفه الثانيه .. وجلست بكل ربكه .. الحين عبد الملك بيدخل .. ياسلاام .. ! عساني ما أصيح بس .. !

ظلت منزله راسها وكأن الجاذبيه تجذبه لحاله لتحت .. يللا يادقايق مري بسرعه .. يللا يالحظات اركضي وخلي كل شي يخلص ..!

ماحست الا بزغاريط قويه ولولولولولوليييييييش , اكيد دخل .. اكيد ..!

ماقدرت ترفع راسها .. بس انتبهت لثوب يتحرك .. ويوقف قدامها .. وبوحده تهمس في اذنها : ارفعي راسك

تلقائيا رفعت راسها .. وشافته يبتسم وباين مستحي .. وحاولت تبتسم بس ماتدري هل طلعت ابتسامه منها او لا ..

طيبه في اذن عبد الملك : وجع ماتستحي انت .. سلم على البنت ..

شلون اسلم يعني ؟ فيه سلام مصافحه .. وفيه سلام ثاني .. لايكون الثاني ....؟

لا انا ابي الأول ..!

مد عبد الملك يده الكبيره يصافحها .. وبسرعه كأنها ماتبي مدت يدها تصافحه وراسها لتحت .. وضحكت على نفسها ..

طيبه بجديه احرجت ولاء : بيلبّسك الشبكة بتظلين منزله راسك ؟

ابتسمت ورفعت راسها وهي تحاول تطالع بكل شي وأي شي .. المهم مايكون عيونه .. واخذت طيبه الخاتم تمسكه عبد الملك .. وتاشر له على صبعها .. مد يده بيمسك يدها .. مدتها بس كانت ترجف .. وتوتّر اعصابه , مسك يدها بيد , وبالثانيه لبسها الخاتم ,, وهنا بدت تحترق اكثر والبنات من عند الباب يصفرون .. واحرجوهم اكثر ..

اخذ السلسال .. وقرب منها يبسكّره حول رقبتها .. بس التقت عيونهم .. وشاف فيها شي اكبر من الحيا ,, شكله خوف .. ! خوف منه ..!؟

لا والله الحين تصرخ زي المره الماضيه .. ! ماعندي استعداد صراحه ..

انتبه لها الكل انها منحرجه حيييل .. فمد عبد الملك السلسال لطيبه تلبسها اياه

اسيل من عند الباب : شوف الحمير ! والله انهم مو كفو زواج , مسوين لي مستحين

هنوف للي خافت من لمحت النظره بعين ولاء : حرام عليك اسكتي ,, والله شوفيها شكلها فيها شي وهو انحرج بعد

ريهام ضحكت : يفشلون صراحه ماله داعي كل هذا حيا .. وبعدين صديقتك ليه ماتاخذ الموضوع ايزي , خلاص صار زوجها

هنوف بمنطق : لا ياحبيبتي واذا صار زوجها .. يعني علطول خلاص بتقوم تضمه مثلا ؟ لازم يتأقلمون , امس الرجال ولد جيرانهم واليوم زوجها ,, شلون تبينها تتصرف معاه عادي وكأنه اخوها ولا ابوها

اسيل بمنطقها : لا عادي والله , انا يوم ملكتي بضاوي بحط عيني بعينه وبسلم عليه زي العالم والناس عادي .. وبجلس جمبه وبسولف .. ليه اسوي نفسي مستحيه واضيع علي هاليوم

ماعجبها هنوف الكلام ورجعت تطالعهم : وجهة نظر

كانوا جالسين جمب بعض .. بس بعاد شوي .. كل واحد على كنبه صغيره جمب بعض .. للتصوير يعني ..

وقفوا الكل حولهم يصورون

اسيل بحماس : امشي نصور معهم ..

ريهام وهنوف انفجعوا : خير ؟

اسيل : بغطانا عادي .. مافيها شي , والله ذكره حلوه ومضحكه بعد

هنوف تتظنز : روحي عادي .. سوي الي تبين معد يهمك احد

انقهرت اسيل وماتحركت ..

روان كانت ورا البنات .. انحرجت تدخل .. وعبد الملك مادرى انها جت .. على باله بندر مسوي له مفاجأه...

دخلت الغرفه الواسعه .. تمشي لهم بفستانها الليموني الناعم القصير .. عبد الملك اول مانتبه لها قام من مكانه وابتسامته اتسعت , ولأول مره يسمعون الجالسين صوته بهاليوم ..

..... : مبروووووووك

عبد الملك سلم عليها : هلاااااااااا والله الله يبارك فيك , ايه كذا اكتملت فرحتنا ..

انحرجت روان وراحت عند ولاء تسلم عليها ,, وعبد الملك طلبها توقف تصور معاهم

بنت خالة ولاء : وووووجع مابغينا نسمع صوته , كان دخلت له اخته من زمان

ريهام سمعتها : عبد الملك عااااااادي ,, يايجيك ثقيل مره ,, او يخرّبها

..... : عادي زي الاخت ,, (وضحكت ) الله يهنيهم ان شاء الله ..

روان توقف قبالهم بعد ماهمست لها طيبه في اذنها : تقول لكم اختاروا ياتشربون بعض عصير .. او تاكلون كيك

تجمدت ولاء بخوف وسكتت ,, عبد الملك انتبه لها وقال بابتسامه : روان قولي لهم ماله داعي هالشكليات ..

طيبه من وراها : اقول الشرهه على اللي يشاوركم .. مالت عليكم

ضحك الكل على تعليق طيبه ,, وقامت .. شوي جابوا الكيكه وارتبكوا هم زياده .. وقفت اسماء تقطع لهم الكيك ..

مدتها لولاء اول شي .. وذيك اصلا لو ودها صرخت وطلعت .. بس ماهي قادره حتى تمد يدها ... تقدمت اسماء وحطت الشوكة بيدها .. بصعوبه شالت القطعه ... واكبر همها مشوار الكيكه لفم عبد الملك ..

طوييييييل كنه طريق الشرقيه .. ! خاصة ان الاخ اطول منها بكثير ..

(ياربي حرام عليكم .. ماكان اكلت لحالي واكل لحاله وخلاص ..

والله خايفه ..

خلاص خلاص لاتقولون بلا سخافه ..!

يللا الحين بمد يدي .. عسى مايخلص بنزينها وتوقف بنص الطريق وينزل هو راسه ويفشلني ..؟

ولاء ..اذا رحتي البيت عطي نفسك ريال .. ! اعقلي عاد والله بيضحك عليك الحين )

ابتسم عبد الملك وهو ينتظر يدها توصل .. لكن فعلا شكلها جمدت .. نزل هو راسه ومسك الشوكة واكلها .. وطبعا الكيكه كانت بدون طعم ..

صار دوره هو ... اخذ الشوكة ونزل يده .. وكتمت ولاء ضحكه موب وقتها ابد ..!

بنات والله شي يضحك .. احس زحليقه انا اطلع فوق وهو ينزل تحت .. !

مو وقته ؟ طيب ..

فتحت فمها الصغير وماكلت غير الكريمة اللي فوق .. عشان بس تمسك ضحكتها .. وهو حس ونزل الشوكه وتركها .. لفت راسها بخفيف .. وتملى دقنها شوي .. وضحكت .. وعلطول مسحته بصبعها وتداركت الموقف ..

اسيل بقهر : هو حمار .. وهي حماره .. حتى يأكلون بعض من بعيد .. قرب منها شوي .. امسح لها وجهها اللي تملى كريمه .. مو واقف لي زي الاهبل ..

ماقدرت ريهام غير تضحك على عصبية اسيل , فرجعت اسيل تكمل : والمشكله هي ماتعطيه فرصه .. الله يشفيهم بس ..

هنوف بعصبيه يقالها ماترضى على ولاء: شرايك يقوم يبوسها الحين عشان ترتاحين ؟

ضحكت : الله يعينهم على انفسهم .. موب صاحين والله ..!

بأمر من طيبه .. فضى المجلس بعد التصوير ... مابقى غير هي .. والمعاريس .. وروان

طيبه طلعت : يللا روان

ابتسمت روان وقامت .. بس مسكتها ولاء من يدها وهي بتقوم فالتفتت روان ..

ولاء بصوت مبحوح : اقعدي شوي

ابتسم عبد الملك لأنه اول مره يسمع صوتها اليوم

روان بضحكه : وش اسوي اجلس معاكم (وغمزت ) ماحب اصير لزقه

وفكت نفسها رغم انها كانت شادة عليها .. وطلعت عنهم وهي تضحك .. وهناك شافت البنات كلهم

وضحكت .. بنت خالتها قالت وهي ترتب شعرها : لحالهم خلاص ؟

روان ابتسمت : ايه وبالموت فكتني بنت خالتك .. تقول كن اخوي بيعضها

اسيل بجديه : لا لا .. ماينتركون لحالهم ذول .. قومي ادخلي والله يغمى على واحد منهم الحين

نغزتها ريهام بكوعها : مو لهالدرجه عاد

ضحك الكل ..

بنت الخاله : والله مدري عن ولدكم بس بنت خالتي واعرفها ,, صج خبله .. بس وقت الشدايد تستحي

الكل : هههههههههههههه

الهنوف تقدمت ومسكت بنت خالتها : اقول لك ماحسيتيها خايفه من شي يوم قرب بيلبسها العقد ؟

..... : بلى بس عادي .. ولاء خوافه ماتعرفينها يعني .؟

سكتت الهنوف وهي تفكر ..: لا.. فيه شي ..

بنت خالتها تمسكها للصاله الكبيره : تعااااالي ولاتشيلين هم ..

بالمجلس .. وبعد دقايق من الصمت ..

عبد الملك : حلوه سجادتهم ؟

رفعت راسها لا شعوريا : شنو ؟

ضحك : مدري .. من الصبح وانتي تطالعين فيها ..

ضحكت غصب , وهالمره بصوت : هههههههههه حلوه .. ماعليها

..... ورجعوا يسكتون ..

عبد الملك : جايين اهلك من الشرقيه اليوم ؟

..... : ايه , بيرجعون الجمعه .. ان شاء الله

..... : لو سمحتي .. ابي سوالفك على اعلى مستوى رنين .. !

ضحكت ولاء وهي تخبي وجهها بيديها , ماشاء الله مانسى جملتها من ذاك اليوم ..!

..... : يعني ,, اشوف اهلي كلهم .. يقولون حبوبه وعسل وسوالفها تجنن ..

ابتسمت باحراج وهي تلف خصله من شعرها على اصبعها : ماقالوا لك انها خبله ..؟

.... : لا ,, بس قالوا لي تستحي ...

..... : ......

..... ابتسم على جمب : وبس تصارخ .. وتقول آآآآآآآآآآآآآآآآآآآآآآ يمممممممممممممممممااااااااااااااه ..(وضحك وهو يتذكر )

احمر وجهها زياده وغاصت بفستانها , واخذت مخده غطت بها وجهها بدون ماتحس . .. والله لو بتتكلم الحين وبتتشجع .. ! بعد كلامه هذا مستحيل بتقول شي ..

ضحك ونزل راسه : طيب .. (وتنهد ) انتي ليه خايفه ؟

ابعدت المخده شوي ورتبت شعرها من قدام وهي تقول بحرج : مو .. خايفه

حس عبد الملك انه احرجها بسؤاله : طيب .. قولي شي

ابتسمت بمرح : شي ..

اخيرا وصل احد ينقذهم .. كانت اسماء جايبه معاها العشا .. : وانتوا من طلعنا ماتحركتوا من اماكنكم ؟

ولاء وبكل عفوية : عادي يعني مو لازم نتحرك

ضحكت اسماء وهي طالعه : الله يسعدكم ان شاء الله

..... : عادي مو لازم نتحرك هاه ؟

ضحكت ولاء على نفسها وهي للآن تحاول ماتحط عينه بعينها .. اما عبد الملك .. كان فعلا يدور أي موضوع يفتحه وبلا هالجو المشحون هذا ..

..... : ماودك تتعشين ؟

ابتسمت : لا مو جيعانه

(أي بطني .. ! اسكت بليييز .. ! )

.... قام واقف للطاوله الصغيره : متأكده .. ؟

ابتسمت وقامت .. وجلست على الكرسي .. تراقب الطاوله الصغيره .. انيقه وحلوه .. بس صغيره ..!

يعني قريب ..!

ضحك عبد الملك على شكلها: اقول ساعديني ,, ترا انا اكلم نفسي اظاهر

تلقائيا رفعت عينها وتلاقت عيونهم ..ونزلتهم مره ثانيه بكل خوف

هنا شك عبد الملك في نفسه .. : وجهي فيه شي ؟ ليه خايفه لهالدرجه اخوف ؟

تلقائيا قالت بتدافع عن نفسها : لا والله ماتخوف .. بس عيونك .. يمّه .. !

هالبنت ..! بتدوّخني .. شلون عيوني تخوف يعني ..!

شافته مستغرب وضحكت على نفسها : لا مو قصدي كذا .. مو قصدي تخوف يعني .. قصدي تربك
ابتسم ويدينه على الطاوله : اها .. اربكتك يعني ؟

والله تشوفين ..! بدال الربكه ربكتين .. ! اصبري علي شوي ..

صارت تطالع الاكل اللي قدامها .. صح جوعانه وبتمووت جوع .. بس ماهي قادره تاكل قدامه .. وبنفس الوقت لازم تاكل أي شي في وجهه .. عشان تكسر برودة الجو شوي .. !

والله هي مو بروده مره .. يعني الجو مشحون .. وحرّ .. بس مافيه نسمات هوا ..

وهو نفسه .. عادي مافرقت معاه اذا اكل او لا .. بس اذا هو مستحي فهي مستحية اكثر ..

عاد مشكله ولاء ماعندها شي اسمه شوي .. ! لأنها متوترة .. وخايفه ,, ومرتبكه , ومنحرجه .. ومو قادره تثبت على حركة وحده .. تحس ودها تقوم وتطلع .. بس لو بتحرك رجلها عشان تطلعها من تحت الطاوله مارح تتحرك ,, خاصة انها حست ان عبد الملك يراقب نظراتها .. خلاص انا الحين شربت عصير شكلي بقوم واقعد ع الكنبه الاولانيه احسن ..

و دوووووووووووووووووووووووووف .. !

بدون ماتحس ضربت رجله بكعبها من تحت الطاوله, وقبل ماتلحق تستوعب شافته غمض عيونه .. شكله تعور ..! ماتعور يعني بس تفاجأ .. توّه الأخ ماسك الملعقه وطاحت من يده

تبي تقول شي .. ! تبي تصرخ ..!

يبي يتكلم .. ! يبي يقول شي .. !!

لكن وش اللي صار ..

هههههههههههههههههههههههههههههههههههههههههههههههههه ههههههههههههههههههههههههههههه من الاثنين ..

ضحك ماله حدود .. ولاء غطت وجهها بيديها ,, وهو راسه للطاوله .. وكل واحد يحاول مايعلي ضحكته اكثر من الثاني

مرت دقايق .. استحت ولاء على وجهها على هالضحك .. نزلت راسها تمسح وجهها عن اثار الضحك الهستيري .. اللي مال أمه داعي

..... قالت بنعومه وسط ضحكاتها : سوري .. عورتك ؟

ابتسم لها وهو الثاني يزفر بعدما ضحك من كل قلبه : لا ..عااااااادي والله

..... : اجل ليه ضحكت .؟

حط عبد الملك عينه بعينها قاصد يربكها : مدري ,, انتي ليه ضحكتي .. ؟

.... : مدري

رجع ظهره لورا : الحين .. اذا رجعت البيت بتقول امي طيبه .. شرايك في البنت ؟ بقول لها بس عديت اسنانها والباقي ماشفته ..

رفعت راسها باستغراب : عديت اسنانها .. ؟

.... : بس طول الوقت تبتسم وتضحك , ومو راضيه تخليني اطالعها .. مع اني اقدر اجي عندها وارفع راسها عشان اشوفها زين .. بس استحي اخاف احرجها .. ولا شكلها خايفه مني قلت الحين بتصرخ .. (وسكت شوي ) بس يعني .. بصراحه .. حلوه .. ضحكتها

حست انها زودتها .. يعني حتى هو بعد يحاول , فشبكت يديها ببعض : ياربيه والله هي مو خايفه منك (بس مقدر اقول لك شفيني الحين ) بعدين انت بتزهق منها بعدين

ضحك : لا لا ,, شكلها مركبة رموش وواحد منهم طايح ,, وماتبيه ينتبه ..!

(فكره غبيه ..! مالقيت يامليك كلام احسن من كذا ؟ )

بثقه مو وقتها : ليه تركب رموش قالوا لك طايحه رموشها ؟ (ورفعت راسها بثقه وهي ترجع شعرها لورا وترمش ) هي واثقه بنفسها ماتحتاج تركيب

ابتسم عبد الملك لما عجبته حركتها .. ودق قلبه بقوه وهو يراقبها لأول مره يشوفها زين .. زي البزر مشت عليها .. لما حسّت وسبت نفسها على غباءها .. رجعت تضحك .. ورجع يضحك هو معاها
بالمجلس ..

روان وهي تجلس بأنوثه وترفع رجل على رجل : فيه اشاعه تقول انه يصير اخوي

اسيل : ادري اخوك بس يرفع ضغطي .. عمى يقهر مايحسّ ,, الله يعين البنت عليه

عصبت روان وهي تتأمل لبس اسيل .. اللي عباره عن بنطلون جنز غامق .. ومعاه بدي رصاصي لمااع .. وشعرها اللي طال شوي مستشور لبرا .. طبعا مكياج مافيه ..

هذي اسيل .. احسها مختلفه عنهم كلهم ؟ ليه كذا كنها ولد ..؟

قطعت ريهام تفكيرها وهي تسحبها : اررررررقصي يللاااا

روان بخجل : لا ماعرف

..... : خربطي أي شي ..

بعد محاولات قامت روان .. ومابقى احد جالس .. كلن يرقص .. شوي وشافوا ولاء تدخل عليهم وصرخوا كلهم : كلولولولولولولولووييييييييييييييييييييييش الف الصلاة والسلام عليك ياحبيب الله محمد

ولاء في مكانها : بنات امسكوني بطيح ,, خلاص تجمدت مدري احترقت .. مدري مدري

اسيل بسخريه : ليه وش سوا لك ؟

طيبه من وراها تمشي ولاء تبي تجلسها بكرسي بوسطم : من دخلت عليهم وهم يتضحكون الحمد لله والشكر

ضحكت ولاء على نفسها : ياربي شفيكم وقسمن ماعرف وش صار فيني

طيبه بسخريه : ولا مليك ماكني معطته دروس امس ..

ضحك الكل ورجعوا البنات يرقصون

روان لطيبه : يمه بندر مشى ؟

..... : لا قاعد مع الشباب ..

.... : وبابا وينه ؟ بتصل فيه

..... : ماعليك منتي رايحه الحين .. اقعدي وسعي صدرك واذا مشينا اخذناك معانا

..... : لا , اخاف امي تهاوشني .. هي ماتدري اني جيت .. وكلمتني تهاوش ..

طيبه بأمر تمد يدها : دقي عليها وهاتي الجوال ..

خافت روان من ردة فعل امها .. لكنها ماقدرت ترفض طلب طيبه .. فمدت لها الجوال .. خذته طيبه وابتعدت .. وكلها ثواني رجعت ترده لها بعد ماكلمت : بتسهرين مع البنات .. كلنا بنجلس للفجر , الا اذا كنتي انتي ماودك ..؟

قالت بسعاده غااامره : لا والله ابي اجلس

ربتت على كتفها : روحي .. وسعي صدرك

حبت روان على راسها ودخلت فرحانه

اسيل بعد ماطلعوا الحريم للغرفه الثانيه .. راحت وجلست جمب ولاء : بنات ,, حرام خلونا نقول لها

ولاء استغربت : تقولون لي عن ايش .. ؟

اسيل بجديه : عن عبد الملك

ريهام وهنوف : وش فيه وش نقول لها ؟

اسيل بجديه اكبر : شوفوا .. حرام البنت تتزوجه كذا على عماها خلونا نوعيها .. اسمعي ياحبي.. عبد الملك هذا انسان بس جليد .. يعني باختصار مايحس .. اظاهر انك انتي اللي لازم تقدمين على الخطوات كلها .. يعني تتجرأين وتتلصقين فيه ويالله بعد .. لاتتوقعين بيجي يقول لك كلام حلو من نفسه .. طلعي كل شي من نفسك , ولا ترا زواجكم حطي عليه إكس

انصرعت ولاء من هالكلام وتغير وجهها , فردت هنوف بدفاع : لا يختي حرام عليك مو لهالدرجه .. اكيد بيتصرف معانا بطريقه .. ومعاها بطريقه

ريهام : انا بصراحه مع اسيل .. بس يمكن هي تبالغ شوي .. (وتحط عيونها بعيون ولاء ) عبد الملك من عرفناه .. صح وسيع صدر ويحب يستهبل .. بس اذا كان مع ربعه واخوياه .. اما معانا والله ثقيل دم .. ومايعبر ولايعطي اهتمام لأي احد .. هو صح طيوب وحبوب .. بس مدري تحسينه جامد ومو بسهوله يعبر عن مشاعره ..

طبعا ولاء سكتت .. والخوف بان في عيونها .. طريقة كلامهم خوفوها وهي مو ناقصه .. لو هي جريئه كان اوكي مافيه مانع .. بس هي بعد تستحي

روان اللي محد انتبه لوجودها : حرام عليكم .. والله هو يستحي بس ..

التفت الكل لها ..

اسيل : عشانه اخوك بتقولين كذا

روان بدفاع : لا .. صح هو مايشبه بندر وانا ماعرفتهم الامتأخر .. بس انا ما أشوفه كذا .. عادي والله وانتوا شفتوا كيف سلم علي ..

اسيل بعدما سرحت شوي في اسم بندر : انا اصلا يوم شفته يحبك على خدك ماصدقت .. قلت الولد دخله جني

ضحك الكل وسط عصبية روان الخفيفة : بسم الله عليه .. وبعدين حرام عليك .. اصلا من اول مره شافني .. وصورت معاهم ثنينهم وعادي جلست بوسطهم .. وماكشّ مني .. عادي كني من زمان اجلس معاهم

اسيل مصره على رايها وتقول بتحدي: طيب انتي اخته .. مدري بس اتوقع لو مثلا يعني مثلا .. تجين بتضمينه يمكن يدفك مايبي

سكتت روان والكل انتبه لها تقوم , اخيرا تكلمت وهي تصلح فستانها بثقه : لا , ضميته مره وما أبعدني .. بالعكس .. شدني له

سكتوا البنات وهم مصدومين

هنوف وكنها ماتبي تخوف ولاء : ترا والله ماهو قاسي لهالدرجه .. شفتي روان بنفسها قالت لك .. لانها اخته شي طبيعي بيكون حنون معاها .. هو كذا قدام الناس يستحي .. بس اذا مافيه غير ناس شوي عادي

ولاء بلعت غصتها وهي تركز وتحاول تتذكر كل مواقفه معاها : خلاص بنات لاتقولون شي عنه .. (وسكرت اذانها ) من زيني انا عاد والله اني افشّل .. .. خلاص اسكتوووواااا

ابتسمت لها روان ومشت .. وهي مقهوره من البنات ..

ريماس اللي كانت تلعب من بعيد .. جات ولصقت بولاء : ولاء انتي بتتزوجين عبد الملك .. صح ؟

ضحكت باحراج : ايه

لصقت فيها وهي تطالع اسيل وريهام بحقد : طيب ماعليك منهم انا سمعتهم ,, هو ترا مايخوف .. بس بيجلس جمبك

ضحكوا البنات .. واكثرهم هنوف اللي تذكرت يوم تقول لها ريماس نفس الكلام بملكتها

< ياليت كل البزارين هذي فكرتهم .. ولا يحرجوننا بأسألتهم ..

ولاء : خلاص طيب مارح اخاف

اسيل تكش ريماس بيدها : قومي تلايطي يابزر .. قليلة ادب تتسمع بعد .. محد طلبك تجين تدافعين عن عبد الملك من زينك انتي وياه

عصب ريماس وحطت يديها على خصرها : مالك دخل .. اصلا انا احب عبد الملك وهو مايخوف ... (ورجعت تلتفت لولاء ) ذاك اليوووووم انا ضعت في الشارع وهو اللي لقاني .. ماخلاني امشي بروحي قال لي تعالي انا بروح معاك البيت , وقلت له ماتخلي احد يلحقني يخوفني ..؟ قال لي لا انتي اذا صرتي معاي لاتخافين .. بعدين انا مسكت فيه وهو ماقال لي وخري ..

وبعدييييين (وتطالع اسيل بقهر ) يوم كنت بروح لبيتهم (تأشر على ولاء ) رحت اركض وجات سيارتهم كانت بتصدمني بس هو مسكني بقوه عشان ماأتعور وهو اللي طق في الرصيف وتعور مسكين. وجا ابوهم خلاه بالمجلس عشان يشوف ظهره وهو اصلا مارضى يدخل .. بعدين ابوهم قال لازم تدخل .. وانا جلست اصيح عشاني غبيه خليته يتعور .. بعدين هو قال لي خلاص لاتصيحين انا ماتعورت .. آآآآصلا عبد الملك احسن منك تفهمين .. ؟ احسن منك ..

سكتوا كل البنات مصدومين .. ريماس دخلت وسمعت اخر كلامهم ,, وشافت الاعتراض على عبد الملك بوجه اسيل ,, وماقدرت تسكت .. وبعضهم مايدرون عن سالفته الاخيره معاها

هنوف قامت لها بهدوء : خلاص اسكتي لاترفعين صوتك ,, اسيل تمزح ترا ..

اسيل خافت ان الخالات يوصل الكلام فضحكت : هههههههه امزح كلنا نحب عبد الملك .. بس انتي ليه كنتي تصارخين ؟ ترى لو درت امي طيبه انك قلتي هالكلام بتلشطك بعصايتها

خافت ريماس وغطت فمها بيديها .. ورمت لها نظره وطلعت

اسيل بقهر وهي تطالع هنوف : صح اختك ,, بس ماحبها ملقوفه خل تنقلع

ابتسمت هنوف وسكتت .. والتفتت على ولاء اللي باين سرحااااااااااانه في عالم اسمه عبد الملك .. بعد كل كلامهم عنه .. حست انها ربطت شي .. يوم تشوفه بالمجلس وريماس جاتهم تصيح .. كانت هذي السالفه اللي صايره .. !!

اهاااااا .. فهمت ..!

بس مين انت ياعبد الملك .. كل واحد يقول شي عنك ..؟

< ميـــــن انت .. ؟

وشهو احساسك .. ! وش اعنيك انا ,, من وسط ناسك ..!