***===== الــــجـــزء الــــحادي عـــشـــر =====***
" على كف القدر نمشي ولاندري عن المكتوب "
عباره كنت ارددها .. صدق من قال معناها
تضحكنا تبكينا .. تمشينا على المطلوب
على كف القدر نمشي دروب ماعرفناها ..
متى حظي يحالفني يصحح وضعي المقلوب ؟؟
يعدل غلطة الايام وغلطه مارتكبناها ..
.................................................. ..............
.................................................
.....................................
..........................
..................
............
......
...
اليوم : الجمعة
الوقت : الساعه 9.30 مساءً
المكان : في العزبة
" سعيد "
يااااااااااااااااااااااااااارب
يااااااااااااااااارب
توفقني بالخطوة اللي بخطيها .. يارب توقف معايه .. الله يعيني على يدوه .. قصدي اللي يعيني على ........!!
يالله الله كريم .. بتوكل على الله واللي يصير يصير انا متوقع شوو بتكون ردة فعلهم يالله خلني أحرك اريولي واسير صوب يدوه وسالم .. الحين الساعه 9.30 ماشيء وقت بردون بيوتهم وأنا بعدني واقف في مكاني ..
خشيت تلفوني في مخبايه .. وحركت ريولي عشان داخل العزبة وأنا داش شفت أبويه واقف عند باب العزبة يرمس في التلفون .. أطالعته بنظرات .. أخاف من ردة فعله " هو بذات " أبويه عصبي لأبعد الحدود ..
سرت صوب يدوه وحصلت موزة يالسه وياهم .. طنشت الموضوع وييت يلست عدال سالم .. عشان يساعدني بالرمسه اللي بوصلها ليدوه ..
سعيد : هاا يدوه مب ناويه تسيرين البيت
أم مبارك : لا يابوك بسير البرد قرصني بعظامي
سالم : موزان قومي
موزة : وين أسير
سالم " وهو يحرها بنظراته " : أقولج قومي ولاتناقشيني
موزة " تتناقل نظراتها بين سعيد وسالم " : أنزين مايصير أسمع السالفه
سالم : أقوووولج قومي يعني قومي لااطولينها وهيه قصيرة
أم مبارك : أشفيك على أم لسان
موزة : الله يسامج يدوه
سالم : موووووووزة
موزة : بقوم بقوم بس لااتعصب
فعلا نفذت موزة اللي قاله سالم .. قامت بس ارتفع ضغطي كانت تسحب ريولها سحاب جنها ماتبا تقوم .. ولا بعد عاقة اذنها عندنا .. شفتها سارت صوب المطابخ .. لفيت على سالم أقوله أبدأ بالموضوع ..
سالم : أممممممممم أمايه بقولج سالفه بس لاتعصبين وتسوين لنا مشكله
أم مبارك : إذا عن رشود وسلطان لا يعني لا .. عيالي مااباهم يسكنون بشقق
سالم : الموضوع مايخص سلطان وراشد الموضوع يخص سعيد
أم مبارك : سعيد ؟؟؟
سالم : هيه سعيد
أم مبارك : شوو مسوي
سعيد " ويطالع تحت " : هاا لالالالا ماشيء بس ....
سالم : أنا بقولج السالفه من البدايه لين النهايه وإنتي فهمينا وقدري موقف سعيد .. وإنتي بيدج تنهين السالفه بسلام وتفكينا من المشاكل وعوار الراس
اليوم : الجمعة
الوقت : الساعه 10.00 مساءً
المكان : في العزبة
" موزة "
مسسسسسسسسستحيييييييييييييل
مسسسسسستحيل اللي سمعته مستحيل سعيد يسويها ..
كنت أتنفس بصعوبه مب قادرة أطلع الهوا من صدري .. وريولي مب قادرة احركهن تجمدن عليه .. خوزت الشيله بعيد عن رقبتيه حاولت اتنفس مب قادرة .. المكان خنقة والموضوع يخنق أكثر ..
ليشششششش
ليشششششششششششششششش
:::
::
سعيد .. سعيد أخر واحد توقعته .. كنت اراقبهم ودمعتيه على وشك إنها تبلل خدي .. شفت يدوه قامت وهيه محرجه بس طول الفترة اللي كان فيها سالم وسعيد يرمسون هيه ساكته ولا ردت على أي كلمه قالوها .. وقفت وطلعت برع العزبة وسعيد وقف بسرعه شفته متوتر وسالم حالته أخس وأخس .. شفت يدوه ردت مرة ثانية العزبة ماادري منوو أدور ..
أم مبارك : موووووزة يامووووزة
يدوه تزقرني ياويلي شوو بستوي أكيد حد بموت فينا اليوم .. سحبت ريلي وحاولت أبين إني ماسمعت شيء مع انه صعب صعب قلبي يعورني أحسه بنفجر من الغصة ..
طلعت من المطبخ وحاولت ماالف على المكان اللي واقف فيه سعيد وسالم .. سرت صوب يدوه ..
موزة : خير يدوه شوو فيج
أم مبارك : ركبي يالله ركبي السيارة بنسير البيت
موزة : سيارة سلطان
أم مبارك : هيه بسرعه ركبي لا اضربج بهالعصى
راشد : أمايه اشفيج وين تبين ويا سلطان لازم تعبلين على الريال انا بوصلج ويايه البيت
أم مبارك : أسكت إنت انا بسير بيت خلفان
أبو سعيد : أمايه حبيبتي اشفيج
أم مبارك : ماشيء ماشيء لحد يكلمني قلت بسير بيت خلفان يعني حرام ولا ممنوع
أم سعيد : لا مب حرام بس بتخلينا أرواحنا
راشد : أمايه فديتج مااقدر أيلس في البيت بلاج
أم مبارك : سطان يالله بسرعه انقفض سكر دبة السيارة
سلطان : إنشالله إنشالله
راشد : سلطان سير بسيارتي أنا بسير بسيارتك
سلطان : راشد أشفيك يدوه تبا اتي بيتنا يعني مافيها شيء لااطولون السالفه وهيه قصيرة عمي محمد هد أعصابك إنشالله مايصير إلا الخير
راشد : سلطان لاتنسى دق تلفون أول ماتوصلون
سلطان : إنشالله شمه وين موزة
شمة : في السيارة
سلطان : حمد وخالد ساروا ويا ابويه
شمة : هيه سارت معاهم لطيفة ونورة
سلطان : خلاص عيل مع السلامة
::
::
طوووووول الطريج يدوه تستغفر وتتعوذ من ابليس .. طول الوقت ويها شاحب ومخطوف .. وكانت تنتفض وعيونها مغرقات ..
أنا حاضنة تلفوني وانتفض من الكلام اللي سمعته .. وخاصة الكلمة اللي قالها سعيد
" مستحــــــــــــيـــل أتخلى عن حرمتيه مســـــتحيـــل "
حاولت إني ماانهار جدام اخويه ويدوه وصلنا البيت .. بسلام .. وطول الطريج سلطان ساكت ماناقش يدوه بسالفه إصرارها إنها اتي بيتنا ..
بسرعه أربع ودشيت حجرتيه وقفلت باب حجرتيه ورايه .. وحضنت مخدتيه ويلست أصييييييييييييييييييييييح بصوت متقطع ..
لفيت يسار وشفت دفتري الخاص فيني تحت المخده سحبته وفجيته وكان مكتوب على أول ورقة فيه :
" يــــابعــــد عمـــــري "
ماتموت محبتك إلا بعد
موتي ..
ويبقى لك مع الذكرى
رسالاتـي
وصـدى صـوتــي
خليت أكس كبيره على هالكلام ........وكتبت تحت هالأسطر :
أثر المصايب ما تجيك إلا من الناس القراب
وبها الزمن حتى الخوي اللي تثق فيه احذره
ما يملي عيون الحسود بالزمن غير التراب
ومن لا يتوب من الخطأ تحرم عليه المعذره
فريته بعيد عني .. كنت أصيح مقهورة مستحيل سعيد يعرس مستحيل .. انزين انا الحين ليش ليش ليش اصيح .. هو يهمني هو شو بالنسبة لي .. قطع عليه هالكلام صوت المسج .. :
أنا رساله جيت من عند غالي
شخص موصيني أبلغ سلامه
جيتك أشيل الشوق بأول وتالي
في شاشة الجوال هذا كلامه ..
وش هي علومك يااابعد كل غـالي ؟
هذا سؤاله جاك
... ومع السلامه
طبعا من نفس الرقم .. ماادري ليش استانست على المسج مع اني معصبة ومالي بارض .. جان أرد وأكتب مسج يقول :
تسأل عن حالي : للأسف حالي مايسر ...؟؟!!
وغلقت تلفوني مااريد أطولها وهيه قصيرة ..
قمت من مكاني وبنت الليت ورديت حضت ريولي لصدي وغصبااااا عني نزلت دمعتي ..
دميت فترة على هالوضع .. ساكته بالضلام ماارمس حتى دموعي جفن ..
ماادري شوو اللي خلاني اسحب تلفوني وافتحه .. كانن عندي 3 مسجات ومكالمة بس مارديت حتى مافكرت اشوف من اللي مطرش وداق ..
طلعت رقم
رقم
::
::
رقم " سعيـــــــــــــــد "
ويلست أتأمل فيه ودمعتيه سبقت الكلمة اللي كنت بقولها نزلت بحرارة على خدي ..
كنت مسيفه رقمه بإسم
: ولد العم :
سرت غيرته وكتبت :
:: خيـــانــهـ ::
قبل مااغلق تلفوني وصلني مسج من من سعيد
ليت البحر يحكي لي
أسرار مافيه
حتى يعرف الفرق بينه
وبيني
إن كان موجه يشكي
اللي يعانيه
أنا دموع الحزن عنوان
عيني
أنا اليتيم اللي فقـد
شخص يغليه
أضحك وأجامـل والشـقـا مبتليني ..!
والله غصبااا عني غصبااا عني شهقت بصوت مبحوح .. خليت ايديني على عيوني ورديت مشيتها .. ليش اصيح ليش .. رديت وكتبت مسج حق حق الحقير ..
طيب و صدقت الحكي !!
غلطان غرتني العيون !!
مادري إن الناس في لحظة تحب !!
و الناس في لحظة تخون !!
الناس آهـ يا الناس !!
حتى في المحبة يكذبون !!
كنت أتصور حبي في عيونك كبـــــيـــر
همزهـ وصل تبدى و لا تعرف أخير !!!!
اليوم : السبت
الوقت : الساعه 6.40 صباحاً
المكان : في بيت بو سلطان
" سلطان "
كنت مستعيل بسرعه أشرب الحليب .. يكفي إني مب شابع نوم .. طول الليل وأنا أرمس راشد كان يتخبر عن يدوه .. بس حنيت على راسه لين ماعرفت السالفه من أولها لين أخرها رجعت الكوب على الطاولة وقفت خليت ايدي في مخبايه عشان أطلع سويج سيارتي .. أوووه نسيت تلفوني مشيت بسرعه صوب الدري وأنا راكب شفت موزة نازلة عيونها حمرررررر , ويها مصفر ..
سلطان : وعليكم السلام
لفت عني الصوب الثاني ..
سلطان : موزة
موزة : ...................
لفيت ويها صوبي كانت تصيح ..!!
سلطان : موزة اشفيج بلاج اتصيحين شيء يعورج ..؟؟!!
موزة : .........................
مسكتها من جتوفها بالقووو وخليتها تواجهني غصبا عنها ..
سلطان : قولي اشفيج لاتخوفيني
ارمسها وماترد عليه فجأة ..!!
::
::
طاحن كتبها من إيدينها واطايرن الأواق تحت ريولي بسرعه طاحت عيوني على الأوراق .. اللي ترسن الدري .. رديت اشوف موزة اللي بين ايديني .. شليت ايديني عنها " خفت عليها " .. ماعرفت شوو اسوي أول مرة اشوف موزة في هالحاله .. ؟؟
فجأة أشوفها تتراجع لورا .. أحس إنها فاقدة التوازن ماتقدر توقف على ريولها .. ماحسيت إلا إيدينها تضرب إيدي وامسكا وارفعها قبل مااطيح على الأرض ..
سلطان : موزة موزة ردي علي موزة
..
::
::
ماعرفت شوو أسوي غير إني أحاول أشلها وبحركه سريعه نزلتها من الدري وشفت البشكارة توها داشه الصاله .. زقرتها تساعدني أنشل موزة السيارة بوديها المستشفى شكلها فقدت الوعي ..
وجني مينون أسوق سيارتي بتهور .. كم سيارة جاوزتها وكم سيارة صيحت هرن عليه عشان أهدي .. بس ماشيء فايده حتى الإشارة خطفتها .. بأقل من خمس دقايق أنا عند باب المستشفى ..
نقلوها غرفة .. وخلولها أكسجين .. الدكتور قالي ضيج تنفس عندها ..
بعد ساعه تذكرت إني مارمست أمايه ولاقلت لها شوو صار .. خشيت إيدي بمخبايه عشان أدق حق أمايه بس تذكرت إن تلفوني ماعندي ..
سرت الرسبشن .. ودقيت على أمايه .. طبعا أحتشرت عليه لأن البشكارة قالت لها شوو صار وهيه حليليها أدق على تلفوني ومحد يرد وتلفون موزة مغلق ..
بعد ماسكرت عن أمايه دقيت حق الدوام عشان أخذ رخصة هاليومين .. شكلي مااقدر أداوم هالأسبوع كامل .. الوضع متكهرب في كل العايلة ..
وصيت أمايه وهيه يايه تيب تلفوني من حجرتيه ..
رجعت الغرفة اللي فيها موزة .. بعدها نايمه .. قصدي بعدها فاقده الوعي .. الله يستر وتقوم بالسلامه كله ولا موزة .. هاي أغلى وحده من أخواني .. واااااااااااايد أحبها .. أحب أطلع اللي في خاطريه عندها .. صح إنها تموت على المغايظ والمقالب بس مع هذا حايزة على مكانه في قلبي ...
....... بعد صلاة المغرب ......
طبعا مايحتاي أقول شوو الوضع عندنا .. بعدها موزة فاقده الوعي .. مانعرف شوو نسوي .. الكل متوتر .. وأمايه الله يهديها وايد مشتطه علينا ومحطيه ضيجتها في الكل ..
سلطان : الله يهديكم إنتوا كلكم متولفين في هالغرفة ومخلصين الأكسجين منها ..
أم سلطان : سكت إنت كله منك ماقلت لي أول ماطاحت
أبو سلطان : خلاص عاد صدعتوا روسنا من الصبح ونحن في المستشفى .. صدقه سلطان لازم نطلع من الغرفة
أم سطان : طلعوا إنتوا وأنا بيلس عند بنتي
شمة : حتى أنا بيلس
وقفنا وطلعنا كلنا .. أم سعيد كانت وايد تعبانه شلاها ريلها ورداها البيت .. يعني محد في المستشفى غير راشد وسعيد وأبويه وشمة وحمد .. يدوه كانت توها من ساعه هنيه بعدين رجعها سالم بيتنا ..
اليوم : السبت
الوقت : الساعه 8.30 مساءً
المكان : في المستشفى
" سيف "
سيف : راشد إنت وينك عن تلفونك من الصبح أدق ليشش ماترد
راشد : أسف والله حاطنه على السايلنت ..
سيف : انزين وينك أنت أنا عازمنك على العشا
راشد : ماأقدر أتعشا وياك
سيف : بوديك حفيت يمكن تشوووف ......!!
راشد : هههههههه تصدق عاد مشتاق أسير حفيت بس مااقدر
سيف : ليشششش !!
راشد : لاولاشيء ..!!
سيف : أوكيه إنت وينك الحين في البيت
راشد : لا في المستشفى
سيف : عسى ماشر
راشد : ماشر بس موزة طاحت تعبانه من الصبح ولين الحين في المستشفى
جنه حد صب عليه ماي باااااااااااارد .. أنربط لساني من إني أقول كلمة وحده ..
سيف : موزة !!
راشد : هيه ولين الحين فاقده الوعي ومحد يدري متى بتقوم ..!!
سيف : شوو صااااار
راشد : ......... ماادري شوو اقول لك
سيف : برايك برايك انا الحين بيي المستشفى
راد : لا مايحتاي مانعين الزيارات نحن بروحنا يالسين على الكراسي اللي في الممر
سيف : أقول لك بيي الحين يعني بيي يالله بااااي
سكرت عنه هذا مايفهم شوو يعني بالنسبة لي موزة .. يقولي مايحتاي
هذي موزة ...
تعرفون شو يعني موزة ..!!!
طلعت بسيارتي من البيت .. وأنا خاطري أطيرني بسرعه المستشفى أريد أعرف شوو صار بالضبط .............!!!
عشر دقايق وأنا في المستشفى .. سلمت على عمي وسلطان وتحمد لهم على سلامة بنتهم ... وسحبت راشد من إيده وسرنا بعيد عنهم ..
قلبي حاسه بيطلع من صدري .. ليته فيني ولافيها ...
هونتها لكنها عيت تهون
لاقلت راح الهم القاه قدام
فيني ألم مامر في قلب مطعون
وفيني حزن ماشيف بعيون الأيتام
عاقل ولكن طحت في وقت مجنون
والنفس طابت من عنا غدر الأيام
راشد : أشفيك وقف الدم بإيدي حشاا مب مسكه
سيف : راشد الحين تقولي شوو مستوي
راشد : شوو تقصد فهمني
سيف : راشد أرمسك عربي
راشد : أدري إنه عربي مب ..
قاطعته صدق متفيج أحر ماعندي أبرد ماعنده هالريال ..
سيف : أشفيها موزة شوو صار
راشد : ههههههه ليششش تهمك السالفه
سيف : هااا لا مب قصدي هاي بنت عمي ومن لحمي ودمي إذا ماهموني أهليه منو بهمني عيل
راشد : امممممممم تصدق عاد صدقت
سيف : راشد بتقول ولا لاه
راشد : بقول لأني مب متفيج لسوالفك البايخه
سيف : اللهم طولج يا روح
راشد : صدعت راسي بحنتك .. أسمع الصبح سلطان شاف موزة وقالها اشفيج وماردت عليه بكلمة بعدين مسكها من إيدها جان يطيحن كتبها وبعدين غمى عليها هاي كل السالفه
سيف : مسسستحيل لازم فيه شيء لازم يكون شيء يعورها أو ...
راشد : لا ماشيء يعورها أمس كانت شرات الحصان في العزبة
سيف : أنزين والحين شووو الحل ؟؟!!
راشد : حل حق شووو ؟؟
سيف : عشان حالتها
راشد : مااعرف الدكتور قال ننطر شوي لين لين ماتقوم من الغيبوبة
سيف : الحين من كم ساعه هيه في الغيبوبة ..
راشد " يرفع إيده يشوف الساعه " : أممممم تقريبا هيه طاحت الساعه 7 الصبح والحين الساعه 9 المساء يعني من 14 ساعه
سيف : 14 ساعه وساكتين إنتوا ماتحسون مافيكم قلوب
راشد : سيف اشفيك تعوذ من إبليس هاي بنت أخويه وتهمني حالتها شوو تبانا نسوي
سيف : ماأعرف ماأعرف خلنا نرجع عند سلطان وعمي
رجعنا مكان ماكان يالس عمي وسلطان ويلست عدال سلطان كانت حالته تعبانه لأنه من الصبح هنيه ماطلع من المستشفى إلا حق الصلاة وعشان يوصل أمه البيت عشان تودع خلود عشان ماتحس إنه شيء مستوي لأن اللي عرفته إن خلود وعبدالله مايدرون إن موزة في المستشفى ..
سيف : سلطان قوم رد البيت عشان ترتاح
سلطان : أنا ماأرتاح إلا يوم اطمان على اختي
أبو سلطان : قوم يابوك سير إرتاح وإنشالله موزة ماعليها شر عندها أمك وأنا يالس هنيه لين مانطمن عليها
بعد دقيقة طلعت شمة من غرفة موزة .. وتوجهة سيده صوب راشد
شمة : عمي راشد أنا ببات عند موزة لأن عموه ماتقدر تودر عيالها بروحهم في البيت
أبو سطان : خلاص شمه قولي حق أبوج وأمج
شمة : إنشالله عمي ,, سلطان أشفيك ويهك مصفرررر
سلطان : ماشيء تعبان وأحس ماعندي طاقة
راشد : وين ماماكل شيء من الصبح
سيف : قوم قوم ويانا بنعشيك وبنخطفك على البيت
سلطان : لالالا سيارتي هنيه عند باب المستشفى
أبو سلطان : إنت سير وأنا بطرش الدريول إيي ياخذها من هنيه بس عطني سويج سيارتك
فعلا نفذ سلطان إللي قاله عمي وعطاه السويج وطلع معايه عشان يتعشا وراشد طلع ويانا بعد بس ركب سيارته وأقترح علينا أول نسير البيت عشان يوقف سيارته وايي معانا يعني نسير رباعه في السيارة أنا وسلطان وراشد ..
