الحلقة الرابعة عشر

مرت الأيام وبدن امتحانات المدارس والجامعات والكل مشغول ولا يظهر من البيت اللي منشغل بعياله واللي باخوانه .......يوم يكون الامتحان هين وقمة السهولة يخلي
الطلااااب ينطون من الفرح ويوم يكون صعب ما يعرفون يجاوبون عليه يخليهم يردون بيوتهم والدمعة على الخد عدا الكسلان اللي مب مهتم وهذه الامتحانات مد وجزر .....

المكان :العين

حمده تسير صووب حيرة سلامه ودخلتها :انتي بعدج ما تزهبتي
سلامه يالسه على مكتبها وفاجه كتاب جدامها وشعرها لامتنه بعفسه مب مرتب ولابسه نظاره رفعت راسها:تراني قلت مب رايحه
حمده تحط ايدها على خصرها:يقول ابووج لو ما رحتي اليوم ما بيشلج تزهبين للعيد قومي بنقضي حايتنا وبنرد فكينا
سلامه بتملل :وخلوود
حمده:الخدامه لبسته يلا انقفضي عندج خمس دقايق .....وطلعت عنها عقب ما رضخت بالباب
سلامه تقوم واقفه وتهز راسها بعصبيه وتمشي اطلع شي بتلبسه:لو ما اعرف ابويه عدل ما رحت اتزهب ويا هالسحليه الغياره
ويالسه تتحرطم ومن الخاطر مضيجه
راحت على المرايا تلم شعرها الاسود اللي يوصل لاخر ظهرها في خاطرها تصبغه وتعدله شرات البنات بس الشي اللي متأكده منه انه ابوها بيرفض لانه يعتبر هالشي ضياع لا حول ولا قوة الا بالله
لبست عباتها وشيلتها وجوتيهااااا وردت اطالع عمرها في المرايا لازم تحط جحال وتحط كريم لويها شكله تعبان سوووت هالشي عقب ما خلصت ابتسمت لعمرها :فديتني حليوووووه
راحت الصاله تشوفهم حصلتهم قاعدين يتريونها الا حمده واقفه وفي حضنها الهنوف
ابوخالد: يلا امايه تراج بطيتي
سلامه تروح صوبه:عليه امتحان فاينل ويالسه اذاكر
ابوخالد ينش ويروح صوب خالد يبى يدفه
سلامه في خاطرها ابوها ما فيه شده :خله عنك ابووووي انا بطلعه
طلعوا من البيت سايرين السوق يزهبون ثياب حق العيد
.
.
.
طلعت من حيرتها وهيه تتأفف ملل*ملل ماعندها شغله تسويها وخاصه انه رفيجتها سلامه ملتهيه عنها في الامتحانات والجامعه وهالبيت على كبره هااادي لدرجة الجنون حتى يدتها اللي مسووويه حس شوووي عند عمها راشد اشتاقت لها وايد رغم انها البارحه رايحه عندهم وحور في خاطرها سهيله عليها امتحانات هيه يوم ما عليها شي ما احتك فيها وايد ووين امتحانات واخواني كلهم لاهين حتى بروك شاد حيله يبى الكورس الياي يتخرج ويفتك ....
وصلت الحوش الهوا حلووو وايد ابتسمت ابتسامه طفيفه ...صدت على فلة اخوها خليفه ولا مره راحت بيتهم في خاطرها تروح بس تستحي ......بعدين قررت تروح شلت عمرها ومشت صووووبهم وهيه مستانسه بالجوووو يبرد الخاطر ويونس المتكدر اول ما وصلت عدلت شيلتها
وصلت الباب دقته بس محد رد عليها ...دخلت
شافت صاله عوده ومرتبه بمزاااج دامه البيت العود حلووو ما بيي بيت خليفه اقل عنه يالسه اطالع اللوحات والجرر اللي فيها
.........:مرحبا مرحبا كبااااار لالا القمر اروحه نازل ومشرفنا ماصدق بصراحه
حور صدت صوووب مصدر الصوووت استحت منه :هلا فيك
خليفه وهو نازل من فوق : شطاري عليهم ولا مره زارونا اكييد اليوووووم حلووووو علينا
يتجرب منها وخاشمته:اشحالك بو شوق
خليفه:بخير يعلج الخير قربي
حور تروح وتيلس :عيل وينها منى
خليفه يبتسم:ما يسد وجودي
منى تنزل من فوق :لا ما يكفي ههههه
حور:افا يا ابوشوق الا تسد وتسد بعد منووووه تمزح اكيد
خليفه يطالع حرمته بنص عين: تشوفين أختي الأميرة شووو قالت
منى تيي وتحب حور :هلا حواري عساج بخير
حور :بخير ربي يعافيج .....مليت وييت عندكم محد في البيت والباقيين لاهين بالامتحانات
منى :مرحبابج الغالية ...شو تشربين
حور بخجل:لا تسلمين ما ابى شي
خليفة:افا سيري منوووه حطي لنا عصير وكيك واللي عندج في المطبخ
منى:هههه انته دومك يوعاااان
خليفه يصد على حور:تشوفينها تبى تحسدني
حور:ههههه حرام منوووه عيونها بارده
منى تقووووم واقفه تبى تروح المطبخ:ودريه عنج ترى اخووج متعود على الدلع والبزا
خليفه:افا ريال بلحيتي تقولي دلع وبزا
حور:عيل وينها شواقي
منى:راقده عقب ما رقصت رقيص ولعبت هلكت وراحت ترقد وفي الليل بتاذيني ما تبى ترقد
خليفه:كيفها بنت خليفه تتدلع من حقها
منى:تشوفينه يوم ابى ارمسها يتم منى ودري بنتي ومن حقها وحالته حاله
حور:فديتها شواقي حليوه ومن حقه يدلعها
منى تحط ايدها في بطنها:بي اللي يحل مكانها
حور تبتسم :خبروج بنت والا ولد
منى:لا ما ابى اعرف
خليفه:ان شاء الله ولد انا خاطري في ولد
منى خافت من رمست ريلها اللي مصر انها لازم تيب ولد مب ايدها غريبه هالموال اللي مطلعنه :خير ان شاء الله
حور:لو ولد شو بتسمونه ولو بنيه شووو سمها
خليفه يبتسم:ولد عبدالله لانه ابويه ما يبى الاحمد يسمي عليه شفتي ابوووج ....بمزح :مخير حمد عنه بجره عاده لازم
منى:لو بنت ما ادري بصراحه لحد الحين ما اخترت لها اسم ....لاهيتونا عن اروح احط فواله
خليفه:انا بقوم اتلبس صارت الساعه خمس ومواعد ربيعي ...حواري فديتج البيت بيتج انزين حبيبتي
حور تقوم واقفه:عيل بقوم اساعدج منى
منى :اوكييييييه
وراحن المطبخ وجهزن صينيه وردن وحصلن خليفه جاهز أكل على السريع وطلع عنهم ويلسن يسولفن عقب حور على صلاة المغرب استاذنت وهيه مبتسمه وتمشي بفرح ووصلت عند حديقة الياسمين ويلست تقطع منها
الا شووي وبصوت عالي
: …..حور
حور لفت بخوف:خوفتني
حمد وويه معصب:شو تسوين هنيه
حور:ما شي اقطع ياسمين
حمد:انزين يلاااا انقفضي روحي داخل الريايل الحين بيدخلووووون يلا بسرعه
حور ما حست بهالنبره عند حمد الا أول أيامها في العين ووطت راسها:ان شاء الله
ولف صوووب الميالس ومشى
حور تمشي بسرعه دايما ويا هالياسمين انهزب اول من مبارك والحين من حمد تنهدت لالا ما بتكدر عمرها السالفه ما تستاهل وبيونه ضيوووف من حقه ينازع وبعدين اكييد ضغووط الشغل لانه حمد مشغول هالايام بالحيل
تفكر اشكثر ابوها يحبه لدرجه انه مايبى حد يسمي عليه الا ولد حمد يا حظك ياحمد مب أنا اللي بعدني ما قادره انسى انه ودرني رغم المحاولات اللي يسويهن الحين الله يعين
.
.
يالس في سيارته ومرتبش ويا هزاع المنهالي يسمع أغنية (غيرتك(
ومستانس طلع من البيت عقب ماذاكر شووي علشان امتحان باجر واطفر يبى يروح عن عمره حاول يضغط على عمره يبى ينجح صح هو ما يهتم في الدراسه بس مب كسلاااان لو يشد شوووي كان ياب درجات عاليه
مبارك ومستانس يغني:غيرتك تذبح فؤادي المولعاني.....
وشووويه ينتبه زحمه في الطريج شوووو السالفه اكييد حادث لاحول ولا قوة الا بالله ان شاء محد متعور أو ياه شي
خفف من سرعته اول ما وصل عند الحادث بند المسجل وفج جامة السيارة
مبارك: خيبه من ورى ادمرت النيسااااان خيبه حريم فيها اشوووف يركز لانه المخفي مب وايد............رغم انه الدنيا مغرب
ويصد الصوب الثاني لفت انتباه ريال يعرفه هو والا لا رد يطالع السياره وتاكد انه هو نزل من السياره ساير صووب الريال اول ماوصل يمكن ثلاثه رياييل او اربعه واقفين عنده وجمن سيارة متيمعات
مبارك:السلومه خير ان شاء الله
ابوخالد:الله يسلمك
مبارك:عسى ما شر يا ابوخالد حد تعور أو ياه شي
ابوخالد:لا الحمدالله نحن لا والسيارة الثانيه هالريال مافيه شي الحمدالله
يرمس الريال اللي اشر عليه ابوخالد:السلومه
الريال:الله يسلمك
مبارك يرد يطالع السياره مره ثانيه ورد يطالع ابوخالد:اتصلتوا بالشرطة
ابوخالد يهز راسه:هيه .....ومشى صووووب أهله في السيارة وقال لهم ينزلوا علشان السيارة واقفه عرض ساده الشارع ومافيها مخفي وايد اشر عليهن يسيرن بعيد عن الريال لين ما يشوووف حل على طرف وهو من الخاطر معصب
يى مبارك صوووبه :ابوخالد
ابوخالد:خير ياولدي ....الا اتخبرك انته ولد منوووو اشوفك تعرف اسمي
مبارك:انا مبارك بن عبيد(....)ما عرفتني
ابوخالد:هيه أخو حور هلا ابوووي اسمحلي كبرنا ولا صرنا نذكر شي
مبارك:اشرايك بودي هلك صوب البيت بدال الوقفه في الشارع جذيه االشرطه لحد الحين ما وصلت وجيه بتردون السياره ما تنفع
ابوخالد عيبه الاقتراح لانه وجودهن هو اللي زايد همه:يزاك الله الف خير ياولدي دومكم هل واجب
مبارك استانس في خاطره :عيل بروح اقرب السيارة صوووبهن
وتحرك مبارك صوووبهن خبرهن ابوخالد انه مبارك بيردهن البيت سلامه عرفته وماتت غيض هذا الحقير شو يابه هنيه
مبارك يقرب صووبهن وبابتسامه طفيفه :تفضلن الشيخات
مشت حمده صووب السيارة وفي حضنها بنتها ومن الخاطر زايغه عقب الحادث والخضه اللي ياتهم الله ستر وما ياهم شي تبى تيلس من الخوف راحت صوب السيارة اللي اشر عليها مبارك بدون تررد وركبت وهيه وبنتها ورى.. وسلامه راحت ادف خالد
مشى مبارك صوووبها
مبارك يمسك الكرسي بعمد مب مبارك لو ما سوى هالحركه وغلس بالبنات وخاصه سلامه شلت ايدها بسرعه واطالعته بغيض
مبارك:انا بدفه عنج .........اليوم متغشيه ما شاء الله
سلامه واقفه الحين بيمننها على سيارته هيه قبل ايام مب راضيه وخبرتها حور انه عصب وتنازعوا وردوا صوب البيت ما راحوا السوق .. وخاطرها تكفخه هو شدخله
مشوا صوب سيارته ركب خالد جدام وراح يودي كرسيه ورى وهيه راحت تركب عدال حرمة ابوها
مشوا بالسيارة
مبارك:الحمدالله على السلامه الحمدالله انه محد صابه شر
سلامه ما ردت
حمدة:الله يسلمك
مبارك استغرب صوتها مب حرمة كبيرة صغيره كانت حمده متنقبه ولابسه عباة راس
مبارك يبتسم: شخبارك يا بطل
خالد ابتسم رغم انه ملامح الخوف على ويهه من بعد الحادث:زين
مبارك يطالع دربه وفي خاطره يبى يرغي :شو تبى تسمع
خالد ماله خاطر بعد الخضه اللي ياتهم :ما شي
ابتسمت سلامه من تحت الغشوة
مبارك اتقفط من الخاطر طالع شرات أخته هالمفعوووص
شوووي الا صرخت الهنووف
حمده يالسه تسكتها وتهزها هيه تصيح بصوووووت عالي
مبارك اتضايج شدخلني فيهم سندرت راسي من صريخها هالمفعوصه دومني منحوس ادور حق عمري
شووووي ووصلوا جدام بيتهم كانت سيارة واقفه وريال واقف عند الباب
عقب ما وقف مبارك نزلن الحريم وهو راح ينزل كرسي خالد
تجدم الريال صوبهن
سلامه:هلا عبدالله
عبدالله:هلا سلامه اشحالكم ومن وووين يايين ......ويأشر على مبارك:ومنووو هالريال
مبارك ما عيبه طريقة كلامه ومنووو هذا بعد شل خالد وحطه في كرسيه
عبدالله يتجدم ويمسك كرسي خالد
مبارك يرفع راسه يطالعه: مبارك عبيد(.......)
عبدالله :تفضل اقرب
مبارك:مشكور فمان الله
ومشى ركب سيارته و هو يطالعهم حمده دشت البيت والريال ماسك كرسي خالد ويرمس سلامه انقهر مبارك من الخاطر منوووو هذااابعد
.
.
.
عيسى يطالع ربيعه :اشوووف ابتسامتك بطر حلجك
عبدالعزيز :توني مرمس سهيله
عيسى:انته شفتها هالبنيه
عبدالعزيز:لا بس ان شاء الله جريب
عيسى :صح ترمسها في التيلفوووون
عبدالعزيز:ما عندها تيلفون الا بالمسن
عيسى:شو اللي مصبرنك عليها
عبدالعزيز:بس جذيه ابى اكسر راسها تتحرا عمرها شي بس تصدق لحد الحين ما اعرف من اهلها بس يمكن متريشه عندها فلوووس ويوم اقولها منو اهلج ما ترد
عيسى:البسها شو تباها ياهل
عبدالعزيز:انطم الشله يايه لا ترمس وانته مالك خص لا تخرب مزااااجي
.
.
.
راشد:خل عنج الخقه ليش تبين تعيدين في دبي
حور:حرام سياف اروحه بيتم
راشد يصد على حمد:انتوا اتخبركم ما تغاروا من كثر ما تطري هالسياف والله في خاطري اشوووفه
حمد: شو نسوي لنا الله
خليفه :عاد انته لا ترمس اكثر واحد تعزك فينا
سهيله:وانااااااااا
راشد:اعووووذ بالله انتي شدخلج بعد
سهيله بعصبيه:اتخبرك انته اشفيك مطيح هنا ما عندك بيت عفناك بصراحه
حمد:سهيله
راشد:جني وايد اهتميت برمستها ما خذ برمسة اليهال
سهيله تصد على حمد:يوم هو يسبني تسكتون جني مب ختكم ويوم اقوله شي تنطون عليه كلكم
يدخل ابوحمد: منو مضايج ببنتي سهالي
سهيله تروح صوبه وتلفه :تشوفهم ابوووي كلهم علي عيالك
خليفه:هو هاذي محد مضيعنها الا دلعك يا ابوووي ترى البنات ما ينعطن ويه صدقني
حور اطالعه بنص عين:لا وشواقي
خليفه:ههههههه لا الا بنتي غيييييير
حمد:وشو اللي خيرها عن البنااااااااات
ابوحمد: ها سهالي شخبار الامتحانات بشري اشوفج قاعده
سهيله بتافف :مليت
حور:ما باقي الا ثلاثة أياااام
ابوحمد:حور انتي متى تبين تروحين دبي
حور اطالعه :ما بنروح اليوم
راشد:ليش شعندج تروحين العيد بعده اسبوعين
حور:ملجة بنت خالتي باجر
راشد:اهااااا
ابوحمد:ها حمد متى بتوصل ختك
حمد:انا
ابوحمد:عيل منووو بيوصلها غيرك
راشد:فالك طيب عمي
ابوحمد:انته التهى بامتحاناتك وشد حيلك يب لنا نسبه ترفع الراس
خليفه:وتقفط ههههههه
راشد:افااااا يا ابووو شوق
حمد يبتسم :ان شاء الله ابوووي الحييين تروح تتزهب
الساعه اربع ونص العصر في السياره درب العين دبي
حور بابتسامه :حمد مشكور
حمد :...........
حور استغربت :حمد
حمد انتبه لها يصد عليها
حور: اقولك مشكور
حمد مستغرب:على شوووو
حور:قالوا لي الهدايا اللي مطرشنهن صوووب قوم خالتي والتجهيزات اللي سويتهن حق الملجه
حمد ابتسم: تستاهل
حور:مطرشتني عاليه رساله لك اقولها حرفيا مشكور وماله داعي هالشي كله وان شاء الله تتعب لك في عرسك وما قصرت
حمد صد عنها بدون ما يرد
سكتت عنه حور.....
شوووي الا بمسج يوصل في تيلفونها

((تمنيتك على بعدك تجي وتجلس معي ساعه
ابي من وقتك الغالي دقايق تسمع اخباري
عليك الشوق ياخذني ولو طيفك مخاويني
ولو طالت ليالي البعد ما غاب لك طاري))

فديتج يا سلامي قالت حور في خاطرها تحس سلامه شي فيها ومب قادره ترمس عنه تحس اخر مره شافتها انه دمعته على باب عيونها بس تحاول اظهر عمرها طبيعيه غريبه هالبنت رغم صداقتها وياها بعدها ما عرفتها عدل وكتومه لابعد الحدود وحور متأكده انه الدنيا اللي تمر على سلامه مب هينه
مر الوقت بسرعه وما حسوا بعمرهم الا جدام بيت بوذياب

نزلت حور من السياره وعقبها نزل حمد بس اللي استغربته يوووم شافتهم كلهم في الحوووووش واقفين وعلامات غريبه على ويوهم والباب الرئيسي
مفتوووح حمد يوووم شاف حريم ما دخل دخلت عليهم ويلست اطالعهم اشكالهم تخووووف مالها خاطر لصدمه يديده يكفيها اللي شافته في حيااااتها علشان تخوز كل الشكوك
حور بابتسامه :شوووو صاير
انتبهت لحرمه متنقبه وفي ايدها ولد :عن اذنكم
وطلعت عنهم
ابوذياب يهز راسه:لا حول ولا قوة الا بالله
سيف يطالع عاليه ونوف :دشوااااا داخل فضيحه حمد جدااام الباااااااب
مسكت نوف ختها ودخلت داخل وتبعتهم ام ذياب وحور بعدها مب فاهمه السالفه وليش ما استقبلوها بحراره نفس كل مره
حور تصد على ذياب وسارت صوووبه هو الوحيد اللي بيريحها :ذياب شو مستوووووي
ذياب شكله معصب وما رد عليها
حور بدت تتوتر :يا ربي من صابه شي
ابوذياب:يا بنتي محد ياه شي دخلي ويا البنات داخل
حمد يدش وعداله سيف:السلام عليكم
ابوذياب وذياب: وعليكم السلام
ابوذياب: قرب ولدي اسمحلنا وقفناك براااا
حمد مستغرب اشكالهم:مسموووح يا ابوذياب
.
.
حور واقفه منصدمه من اللي سمعته واطالع خالتها اللي تصيح وبنت خالته اللي ساكته وما عارفه شو شعورها الحيييين
حور تتنهد:يعله النفاد برايه عاليه هذا ما يستاهلج لا تكدرين عمرج
عاليه :عقب ما الملجه باجر عقب ما عزمنا الناس عقب ما انفضحت
حور بعصبيه:شو فضيحته ......وتصد على خالتها:لا اتمين جذيه تصيحين خالوو الله يهديج جنه حد صابه شي خرعتوني
ام ذياب:وهالشي هين يا حور
حور تتنهد وتيلس عدال بنت خالتها :لا ادري والله انه مب هين
عقب ما طلعت ام ذياب يلست حور ويا عاليه تهديها شوووي
حور اطالعها:عاليه انتي تبينه
عاليه تصد عليها: تصوري يقولوا لي من اكثر من ثلاث سنين هذا خطيبج يعني ريلج اللي بتاخذينه تعودت انه اسمي في سالفة العرس ينربط ويا اسم بطي
حور:يعني حبيتيه
عاليه:متعلقه فيه خلاااااص ما تصورت اكون لغيره فهمتيني يا حور
حور :انزين هو من متى معرس
عاليه تبتسم بسخريه : شفتي ولده عمره سنتين
حور:وكيف خذها من دون شور اهله معقوله ما خبر امه
عاليه:هذا اللي صار وهيه مصريه كانت تدرس وياه في الجامعه وتعرف عليها وحبها عقب ماخذها ودرت الجامعه ويابها هنيه سكنها في شقه وحملت ويابت محمد
حور: بس ليش يابها هنا وهو يدرس هناك
عاليه: ما ادري شو السالفه بس هذا اللي فهمته وراوتنا عقد الزواج واونه ايي كل شهر تقريبا بوظبي عندها طبعا اهله ما كانوا يدرون
حور اطالع بنت خالتها عاليه قويه وايد وتتحمل على عكس حور ونوف
عاليه :تصدقين صدمه بس الله كتب ما اخذه
حور:يعني
عاليه :اكييد ما اريده توني قايله لابووووي هو اونه شوروها جان تباني يى عقب ما دقله ابووويه تيلفوووون
.
.
.
الساعه عشر ونص في الليل
أحمد يطالع حرمته :بخيته يا بنت الناس استهدي بالله انا شو دخلني باخووي
بخيته:واللي سويتوه شووووي
أحمد يهز راسه:بخيته والله انه اليوم راسي دايخ وما عارف اودي ويهي وين عن عمي شوووو اسووي اكثر والبيت وبطي انطرد منه
بخيته ساكته
ذياب ايي صوبهم : أحمد امك مستعيله
أحمد :اختك مب راضيه تروح
ذياب يطالع بخيته : يلااااااا شلي قشي روحي ويا ريلج
بخيته:مب رايحه
ذياب بعصبيه :مب ناقصينج يالله بخيته عنبو ولا جنج ام عياااااااااال انقفضي
دخلت بخيته داخل
احمد يمسك ذياب :ادري انه كل مني يا ذياب بس والله ما دريت انه معرس والا انا ما ارخص بعاليه
ذياب رغم الحزن:افا عليك رايتك بيضا ياأحمد غلطت اخوووك ما بنحاسبك عليهاااااا
طلعت بخيته لابسه عباتها وشاله شمه الراقده وماسكه بايدها شيخه
ذياب يبتسم يوووم شافها مبوزه:ترى الحريم ما يبالهن الا العين الحمرااااااا
أحمد:أنا بخوووت ما تهون علي
ذياب:عز الله ركبته راسك
أحمد:ههههههه
.
.
بعد أسبوع من الأحداث السابقة

لابسه عباتها ومتغشيه ودخلت الميلس
عاليه:السلام عليكم
ابو ذياب وبطي واقف :وعليكم السلام
عاليه راحت ويلست عدال ابوها
بطي يلس مكانه :اشحالج عاليه
عاليه:الحمدالله
ابوذياب:عاليه بطي يباااج وبعده متمسك فيج
عاليه:بس هو متزوج وعنده ولد
بطي :انا طلقتها يا عاليه
عاليه:انا مب موافقه ورد لام ولدك ابرك لك
بطي:بس
عاليه توقف: اسمحلي يا ابووي اللي عندي قلته ...........ومشت عنهم
في الصاله يالسه حور وعدالها نوف
حور : وحشووووني اخواني تصدقين
نوف: شوووو شووو ان شاء الله مليتي منا
حور:منج يا مرتي اخوووي لا
عاليه واقفه عند الباب:عيل مليتي مني
حور:ههههههه بعد لا ....انا ما قلت مليت منكم قلت اشتقت لهم
نوف ترمس عاليه:راااح
عاليه:هيه على ما اظني اوين اخذه مستحيل
حور:يخسي الا هو بتاخذين شيخه انتي
عاليه:انا مستخسره الفستان اللي شريته هههه
حور:انزينه ملجت نوفوووووه عقب العيد مب بعيد
نوف:ها
حور:اشفيج الشيخه والا ما تدري
عاليه:عاد تستعبط شوووو نسووووي فيها ......بقوووم اعق عباتي عقب بيي
شووووي يرن تيلفوووون حور
ودخل ذياب وسيف :السلام عليكم
حور ونوف:وعليكم السلام
حور ترد على تيلفونها:هههههه الناس تسلم
راشد:انتي في دبي ومخلتني ويا السحليه ختج جني ياي اطلبها يالسه تنافخ جدامي
حور:محشوم يا راشد
راشد:خل عنج محشوووم ودهان السير شو دبي
حور تبتسم:رقيص تسلم عليك
راشد:يبالنا ندغشها
حور:مرحبابك .......شخبار عمي وهلك واخوانك
راشد:تمام هنيه اللي يالسين ويايه كلهم يسلمون ما فيني اعدد
حور:الله يسلمهم من الشر سلم عليهم
راشد يرمس اهله:حور تسلم عليكم
الكل:الله يسلمها من الشر
راشد:عيل برايج سلمي على سيف وقوليله بيي يوم واشوووفه
حور:ان شاء الله مع السلامه
راشد:فمان الله
حور بندت وهيه تضحك تصد على سيف :راشد يسلم عليك
سيف:الله يسلمه من الشر
حور :واونه في خاطره يتعرف عليك
سيف: حتى انا من كثر ما رمستيني عنه
حور تصد عليه اشفيه ساكت مب من العاده وخاصه هالايام وايد متغير عندها ما عارفه تفسر تصرفاته بس وايد تحسنت عن اول وهيه استانست بهالشي وايد بس معصب شكله
سيف يطالع نوف ويبتسم :نوف شحالج
نوف: بخير بعافيه فديتني ما فيني شي
سيف يطالع ذياب:في ذمتك حد يرد على خطيبه بهالطريقه يا خي علم اختك
ذياب بعصبيه مب متفيج له:كيف تباها ترد عليك بعد
سيف:افااااااااا الحين بغيتك عوووون صرت فرعون
ذياب يصد على حور: روحي سوووي حور لنا عصير موز
حور والله انه فيه شي :ان شاء الله .........وراحت عنهم
ذياب ينش واقف منغااااض من سيف عااادي عنده كيف حور ترمس راشد في خاطري اعطيه كف يبرد قلبي:نوووووووووووف سيري شوفي عاليه
سيف يطالعه:بكلها انزين بكلها اناااااااااا
ذياب:اختي كيفي اجلب ويهك .........ومشى عنه
نوف دخلت وهيه مبتسمه بانتصار انها قهرت سيف
ذياب يدخل المطبخ ويتم يطالعهااااااااا
حور صدت عليه: شو تبى ذياب
ذياب يطالعها :وليش ولد عمج عنده رقمج
حور تكمل شغلها : شووو فيها يعني تحريت عندك شي
ذياب:يعني عادي عندج
حور:ذياب يوم اخوااااااني ما قالوا لي شي انته بتتحكم فيني
ذياب عصب من الخاطر :يعني
حور تحط الكوبات في الصينيه وصدت عليه:يعني دامهم يعرفوووون اخواني محد له دخل هذا ولد عمي عادي ارمس وياه هو الغلط اني ارمسك
ذياب مستغرب من رمستها وعصب :ااناااااااااا
حور ارتبكت من نظرته وصدت عنه :عااااااااد ذياب لا اتم تهزبني شرات اول الحين كبرت اعرفك تعدني شرات عاليه ونوف بس.......وصدت عليه حصلته واقف وراها ويطالعها بنظره ما فهمت معناها هنيه صدق زاد توترها وارتباكها وماقدرت تكمل رمستها شو فيه هذا صدق بيجلطني لا يتم يطالعني جذيه
ذياب كسر الصمت :كلامج معناته اني مالي خص فيج وماشي يربطني فيج
حور تبلع ريجها شو يقول هذا يربطني فيج ....يبعد شوووي علشان على الاقل اتنفس من ريحة عطره اللي خنقتني
عاليه واقفه عند الباب: ذياب شو تسوى هنيه
ذياب انتبه :ماشي اشرب عصيري لاني بظهر ويا ربيعي
عاليه : اها شوووو خلصتي حور
حور تصد الصوب الثاني وتاخذ نفس وتصب العصير في الكوبااااات :هيه ....وصدت عليه بدون ما اطالعه :تفضل
ذياب يطالعها بس هيه ما رفعت عينهااااااا
عاليه: شي ثاني ذيااااااب
ذياب يروح صوبها :لا انا طالع .........ومشى عنهن
عاليه تروح صووووب حور واطالعها بنص عين: شو السالفه
حور مرتبكه بس تحاول تطلع طبيعيه :أي سالفه بعد .....وصدت عنها :اشربي من عصيري لا يفوووووتج انا بروح اشووووف نوف وينهاااااا ....وطلعت عنها
عاليه اطالعها اشفيها مرتبكه :علينااااااا يا حور
.
.
.
في السيارة درب دبي العين
حور تصد عليه:مستانسه انك انته اللي ياي
مبارك:شوووو اسووووووي حكم قرقوووش ابووج......... وحمد سافر امس
حور:سااااااااافر
مبارك:وهبي شوووي شوووي هيه سااااار قطر
حور: شوووو يسووووي
مبارك:هو ومحمد ولد عمي وعمي راشد رايحين شغل
حور:هيه
مبارك:جنه حد جب عليج ماااااااااي بارد اشيااااج
حور:ماشي
مبارك:اخبرج بآخر التطورااااااات
حور بحماس :شوووو استوووووى
مبارك:حمد قرر يعرس
حور فاجه عيونها على الاخر:قوووووووول والله منووووووو
مبارك:هذا في علم الغيب لا أعلم بس هو وافق يعرس وهالرمسه سمعتها من امايه
حور مستانسه:كشخه
مبارك:عاد سمعتي الخبر المفرح الحين بخبرج عن منى
حور بخوووف: شفيها
مبارك:اليووومالصبح رقدوها ما ادري شو فيها يمكن تبى تولد
حور:بس اظني بعدهااااااا
مبارك:أي دونت نوووووووو
حور:يالله يعينها ويسهل عليهااااااااااا
مبارك:الحين دور الخبر اللي ها وسط يعني
حور :ههههه قووووووووول كلي آذان صاغيه
مبارك:يعني ويايه
حور:يلاااا مبارك
مبارك:انزين انتي ويايه على الخط
وشووووووي يرن تيلفون حور شاااافت الشاشه شقت ابتسامتها الحلج
مبارك يمط تيلفونها يطالع الشاشه :والله عرفتها محد غيرها يعكر مزااااااااااجي
حور تمط تيلفونها :حرااااام عليك هذي عمري لا تقول جذيه
حور ترد عليها بكل شووووووووق ووله تحس اشتاقت لها وايد:هلا بعمري هلا بحيااااااتي هل بريحة هلي هلاااااا والله بسلامه شيخة الحريم
سلامه:ههههههههه هذا كله لي خلاص ما بنازع ولا شي اسمع بس
حور:هههههه والله وحشتيني اشحالج
سلامه :بخير الحمدالله يا قلبي
ويلست تسوووولف وياها ومبارك طفش منهااااااا
مبارك:خليها تبند بسج
سلامه :عيييل برايج حواري قولي ثقيل الدم عندج صدق كريه بالله كيف مستحميلينه بس ياخذ من صفات خطيبي
حور:ههههه خطيبج مسافر
مبارك صد عليها مستغرب
سلامه:ويي يعلج فضحيتناااااااا يلا مع السلامه
حور:فمان الله ....سلمي
سلامه:السلام يوصل
مبارك يطالع حور:منووووو خطيبها وشدراج انه مساااااااافر
حور:ما شي سوالف بنات انته شدخلك
مبارك اغتاظ منها: ولي
حور سكتت عنه
مبارك :هيه لا يكووون خطيبها هذاك اللي اسمه عبدالله
حور عاقده حياتها :منووو عبدالله
مبارك اباااج انتي تجاوبيني منو عبدالله ويرمس بعدم اهتمام:شدراني يوم الحادث الريال اللي قلت لج عنه
حور :هيه تعنى عبدالله لا مب هوووووو
مبارك ما حب يكمل حواره طول على المسجل وسكت
.
.
.
على المسن
عبدالعزيز:
اانتي تضحكين عليه والا شوووو

سهيلة:
ما اقدر ما تفهم

عبدالعزيز طلع من المسن ماله خلق لها تواعده من يوم ليووووم

سهيلة تبند الكومبيوتر اففففف زعل صدقه من متى اقوووووله بس ما اقدر شووو اسووووووي
.......:سهيله
سهيله تفز واقفه تركض تطلع من الحيرة
ام حمد:انتي شو تسوووين هنيه قوووومي بنروح المستشفى عند حرمة اخووووووووووج
سهيله بملل:لازم
ام حمد:شووو عندج بتسوووووووينه يلا انقفضي
سهيله تروح صووووب حيرتهاااااااا :ان شاء الله