الحلقة الثالثة عشر


المكان: العين
كامله اطالع امها : انزين ليش امايه رفضينه حتى شور ما شاورتوني
ام كامله تصد على بنتها:انتي ما تفهمين اقول ابوج ما يباه تقولين شاوروني
كامله مبوزه : انزين شووو فيه علشان يرفضه
ام كامله: وابوووووي على رمستج صدق فاصخه الحيا اونه ليش وما ليش اكيد سمع انه مب كفؤ ياخذج والا تبينا نلقفج اول واحد يدق الباب
كامله :اففففف يانا معرس وطيروه بنعنس وما بنعرس معروفين انتو(.....) خقتكم واصله حدها وفايضه ما ادري شله كل هالرفعه عن خلق الله
ام كامله: صدق انج ما تستحين شو عايلنج وانتي بعدج ما كملتي 18
كامله اطالع ساعتها تبى تغير الموضوع بتدخل ويا امها في موضوع اكييد نهايته بتكون هزبه كبيرة والا كفخه محترمة:مب جنها نوال....
نوال تدخل عليهم الصاله: السلام عليكم
كامله تصد اطالعها:وهبي سويحره سمعت اسمها ويتنا تنط
نوال تحب راس امها : خيبه تخيبج شو كنتي تطريني بالشر والا الخير وعلى ما اظني الاول
كامله: انا واحيت اقووول شي طبيتي حظرتج
نوال: تسلم عليج مس مريم وسألتني عنج ليش غايبه قلت لها دلع ما خلصها تنش
كامله:غربلات عدوج ليش ما قلتي لها مريضه اكيد بتهد عليه باجر
ام كامله: تبين ختج تجذب بدال ما تعلمينها الصح اصغر عنج
كامله:من صغرها الحين اشووي وبتوصل طولي والا بينا سنه
ام كامله:خل عنج الهذره نشي ويايه بسير اشووف الغدا ...........وانتي نوال روحي بدلي وبدق حق ابووج تأخر
نوال تمشي:ابوووي برا يرمس البيدار الحين بيدخل
ام كامله : عيييييل بقوم اشووف الغدا لا تبطين وزقري خوانج
نوال تروح صوب الدري:ان شاء الله
.
.
.
ام سعيد : شو فيها يا ولدي
سعيد بضجر: شدراني امايه اونه دايخه
ام سعيد : ما ادري شو اقوولك بس لانها في شهورها الاولى واول مره تحمل اكيد بتتعب جان تبى تطمن ودها المستشفى وبسير فياك
سعيد يمسح على شعره لابس كندوره بيضا مفجوجه معاقمها ومب لابس غتره وشكله تعبان : مارضت امايه واونها تبى تروح عند امها بترتاح
ام سعيد اوت لحال ولدها توه ياي من الشغل هلكان وما واحى يرقد ويرتاح أكيد عاليه مب مخلتنه يرقد من دلعها : انزين ودها عند امها يوم تبى هالشي
سعيد مشى عن امه : بروح اشووفها
ام سعيد ردت الصاله وكانوا فيها اولادها محمد وراشد وعبيد
راشد: اشفيها امايه حرمة سعيد
ام سعيد اتيي تيلس عدالهم: وينه ابوكم راح يرقد
عبيد: هيه راح يرقد من شوويه
ام سعيد تصب لعمرها جاهي :تعرف في شهورها الأولى وتعبانه شووويه
راشد:هيه وعاد الحرمه عاليه الدلع من عقبها
محمد: راشد عيب عليك
عبيد: صدقه كريهه
ام سعيد: وابوويه اون كريهه ما تستحى ترمس عن حرمت اخوووك جذيه يا المفعوووص لسانك يباله قص
عبيد:عيل مره ما عرفت احل مسألة رياضيات وقلتلها تسويها لي قالت ما تعرف هيه واصله صف ثالث ثانوي وما تعرف بصف اول اعدادي
ام سعيد: عيل حق شو حاطين لك مدرس خصوصي ليش ما خبرته يحلها لك
عبيد: اونه يحلها تراه هو عاطني اياها واجب
محمد: بتتعبين وياه هذا امايه خليه عنج ....انزين لو يودي سعيد حرمته المستشفى
ام سعيد تحط كوب الجاهي: قلت له بس اونه ما تبى وبتروح عند امها
راشد: امها دكتورة ونحن ما ندري ههههههه
عبيد:ههههههههه انا ما ادري بصراحه
ام سعيد تنش : انا بروح ارقد شووووي محمد فديتك المغرب اباك توصلني بيت عمك
محمد: بيت منو من عمومتي
ام سعيد: بيت عمك عبيد
محمد ابتسم: ان شاء الله ما طلبتي ..........وراحت عنهم
راشد يطالعه: وليش ان شاء الله ابتسمت
محمد فاج عيونه: جيه حرام حد يبتسم
راشد :نووووو بس مب وقتهاااااا
عبيد: الابتسامه في وجهي اخيك صدقه
راشد :حافظ كلمتين وياي يسمعهن ....ويصد على محمد: يوم تبون تروحون خبروني بروح وياكم
محمد: وينها سيارتك
عبيد:اكيييييييد في الكراج والا ما شفته هنيه في البيت
محمد: وهالسياره دومها في الصناعيه ثرك انته شو تسوابها
راشد يطالع عبيد بغضب : شو اسويبها بعد ما ادريبها الحراره ترتفع وابووي الله يهديه قال ما بيشتري لي غيرها لحد ما تخرج
محمد: انزين شد حيلك امتحانات نص السنه قربن وانته ما صكيت شي
راشد عند الباب:مب محسوب
محمد:لا والله انزين تقيم عمرك وعقب كله بيتراكم عليك يا شاطر
يدخلون الصاله سعيد وحرمته:السلام عليكم
محمد وراشد وعبيد:وعليكم السلام
سعيد:محمد خبر امي بنروح بيت عمي جنها رقدت وما حبيت ازعجها
محمد: ان شاء الله .....ويصد على عاليه:ما تشوفين شر يا عاليه
عاليه بدت تتعود عليهم صح مب وايد تاخذ وتعطي وياهم بس بدت ما تغطي ويها عنهم وشحوب الويه باين عليها :الشر ما اييك
سعيد شكله معصب يرمس عاليه: يالله ....وصد على خوانه:فمان الله
محمد حس باخوه وابتسم له بمعنى هدي شووي:الله يحفظكم
سعيد ابتسم له ...وطلعوا
راشد: شكله سعيد مفووول
محمد:الله يعينه
عبيد :بس تصدقون من عرس تغير مب سعيد الأولي عيل حمود لا تعرس جان جذيه العرس يسوي
محمد وراشد:هههههههههه
محمد:عيل انا مفكر اعرس وعلشان خاطرك بهون
راشد: شويت اونه هونت علشان خاطرك .......لاتنسوني يوم تبون تروحون بيت عمي بروح ارقد.....وطلع عنهم
عبيد:حمود عطني جريدة الرياضه اللي عدالك
محمد يفرها ويوقف: اول شي حمود في عينك انا اخوك الكبير يا الهرم حشم
عبيد: ول ول كلتنا
محمد يتطنز:اخافك تاكلها من كثر ما تقراها
عبيد على نياته: اصلا انا ما أقرا اطالع الصور عيل يخلصني اقرأ
محمد:صدق انه ما عندك سالفه ...........وطلع عنه هو الثاني
.
.
.
سلامه تتنفس بعمق وادق الباب
وشووي ينفتح الباب ويطلع ابوها
ابو خالد:ها امايه شو تبين
سلامه موطيه راسها: ابووي قايله لك انه حور بتخطف عليه وابى فلوس
ابوخالد يحط ايده على جتفها:سلامه انا واثق ببنتي والا ما خليتج تروحين مع ناس غرب
سلامه باندفاع: بس ابووي حور من اهلنا
ابوخالد:ادري بس اهلها لا..... المهم يا بنتي لا تخليني في يوم اندم اني وثقت فيج
سلامه ابتسمت لحرص ابوها:ابوي انا تربيتك وما بييك مني بس اللي يسرك
ابوخالد:بارك الله فيج ووينه اخوج خالد
سلامه:رقدته ما اقدر اشله ويايه
ابوخالد: برايه هنيه حمده بتشوووفه ...
حمده تطلع من الحيره:اشفيكم واقفين
ابوخالد : جم تبين يا سلامه
سلامه موطيه راسها مستحيه من ابوها: ما ادري يا ابوووي
حمده مستغاضه:انتي مب قد اللي بتشتريه حور لا اتمين اطالعين عليها
سلامه اغتصت:بشتري اللي اقدر عليه
حمده:مع انه روحتج هذي مالها لزمه بنروح انا ووياج بدال ما تعبلين على العرب
سلامه اطالعها بغيض:حور تباني اروح وياها .......وصدت صووب ابوووها
ابوخالد طلع لها فلووس وحمده منقهره وتقول في خاطرها يعلج ما تتهنين فيهن
سلامه مبتسمه:تسلم يا ابووي
ومشت صووب غرفتها مبتسمه ابوها رغم انه عيشتهم بسيطه الا ما مقصر عليها ...لفت شعرها على السريع لبست عباتها المبنده ولبست شيلتها
واطالع ويها في المرايا دامها بتتغشى لانه حمد من رمسة حور لازم الغشى عنده حطت جحال وجلوووس وردي....بتروح تيلس في الصاله علشان تسمع السيارة يوم تيي هيه فرحانه من الخاطر انها بتروح ويا حور السووووق
.
.
الساعه اربع ونص العصر في بيت عبيد بن سالم
حور معصبه ويالسه اطالعه :دخيلك حمد انته واعدني
حمد متلوم فيها : سمحيلي بس الحين لازم اقابل مندوب الشركه بيسافر الساعه 6 المغرب حواري سيري ويا امايه
حور: اول شي عمتي قلت لها من قبل وقالت مب فاضيه وسهلوه ما طاعت
.......وتيلس على الكرسي بيأس: يعني اروح ويا الدريول عنبوووو
حمد يتافف ويالس يطالعها هو واعدنها :لازم اقابل المندوب سعيد اتصل قالي مشغووول ما يقدر وابوويه قالي أنا اروح
حور :حراااااااام عليك حمد ليش ما قلت من قبل انا واعده ربيعتي
حمد : اففففففف يا حور قلت توه سعيد داق لي قدري ظروفي
مبارك وفي ايده كوب عصير وسندويجه:اشفيها دلوعتك
حمد يطالع مبارك محد غيره هو اللي بيوديها:مبارك ودها السوق
حور اطالعه: ماااااا ابى
مبارك:مالت عليج جني اانا ميت اشلج صدق بزا
حمد يصد عليها:حور اخرتيني خلي مبارك يوديج خل عنج الدلع ........وتقرب وحبها على يبهتهااااااا:مره ثانية بس صدقينني هالايام مشغول بعوضج ان شاء الله
وراح عنها ....
مبارك: الله واكبر يا الدلع والله عاطنج فيس بصراحه
حور مبوزه: مبارك لو سمحت
مبارك:جان تبيني اوديج عاااااااادي العرض ساري مفعوله لمدة عشر دقايق اونلي هذا علشان خاطر حمد
حور بضيج: بس ما بطيع
مبارك مستغرب عاقد حياته:منووووو هذي؟ صح انتي ويا منو بتروحين
حور:ربيعتي سلامه
مبارك : وليش ان شاء الله ما بتروح يوم انا بشلج ما كانت بتروح ويى حمد يلاااا انقفضي محد غيري بيوديج
حور اطالعه بنص عين :وانته ناسي شووو سوويت
مبارك صد عنها :بتروحين والا لا
حور تفكر ان شاء الله توافق...... لو سويت لها تيلفون مليون بالميه بترفض اكييد ما بتوافق بس اذا وصلتها لحد البيت بتوافق على ما ظني
حور تروح صووب حيرتها : اوكييييييييييييه
هو الثاني دخل حيرته ويلس يتلبس وتسبح بالعطر ولبس غترته شل بوكه وسويجه .........وطلع حصلها يايه صوب حيرته
مبارك ابتسم :تزهبتي
حور بابتسامتها الحلوه كانت لابسه تنورة جينز وقميص تي شيرت اسود
وجوتي بوت وعباة مفتوحه وشيله على نفس نقشت العباة.......وهي تمشي صوبه:ياي يهالعطر شو هالريحه السنعه والكشخه
مبارك يمسكها من ايدها ويمشي :فديتني طول عمري كشيخ عندج شك
حور :هههههه لا
:….على وين ان شاء الله
حور تصد صوبها : بنروح السوق ترى سالتج الظهر قلتي ما بتروحين
سهيله اطالعهم بغيض : برايكم
ومشت عنهم صوووب الصاله ...هم ساروا اللفت وركبووووه
مبارك: انتي شو تبين تشترين
حور:حق العيد والجامعه
مبارك :اهااااااا
وركبواااا سيارتهم وما طولوا وايد في حدود الثلث ساعه كان الصمت سيد المكان وحور بالها مشغول وترتب الكلام اللي تقنع به سلامه.... بس اللي تعرفه زين سلامه عنيده وايد والله يستر
ووصلوا بيت سلامه
مبارك وقف السيارة جدام باب البيت:حور
حور:...........
مبارك عاقد حياته:حور اشفيج
حور:ماشي شو تقول
مبارك:ارمسج وما تردين نزلي زقريها وصلنا
حور تتغشى وتنزل من السيارة واول ما وصلت حور عند الباب انفتح
دخلت حور الحوش وسلمت على سلامه
سلامه:من الصبح متلبسه قلت حور هونت
حور ابتسمت :شو هالكشخه سلامي اليوم حاطه جلوس مب من العوايد
سلامه تعدل شيلتها :قلت بتغشى في السوووق مافيني على اخووج حمد يفشلني ويفرني من السيارة عاااد هو الخطيب ما زين اطيح من عينه
حور ما عرفت شو تقول:سلامه
سلامه تتغشى:نعمين
حور بسرعه:مبارك اللي بيشلنا مب حمد
سلامه تفج غشاها واطالعها بنظره مافهمت معناها
حور تتجرب منها تبى تقنعها
سلامه اطالعها وتاشر بايدها :حور عيني لا تحاولين استحاله اوافق سيري انتي الله يسهل عليج وانا هلي بيودوني
حور:لبسيه ولا تعطينه ويه
سلامه اطالعها بغيض وبصوووت عالي:لا والله... مب هذا اللي طاردني من بيتكم تبيني اركب سيارته لا حشى سيري ابووويه الله ييسر امرج..
حور بترجي:سلامي...
سلامه تمشي عنها:تعرفين حور اخووج مس كرامتي طردني من بيتكم وانا استحاله اركب وياه تفهمين سمحيلي حور وتعرفين رمستي وحده
حور عرفتها وصلت حد ما تقدر تقنع سلامه اطالعتها وطلعت من البيت
ركبت السياره ويالسه اطالع مبارك بقهر
مبارك عرف انها رفضت:شوووو وينها
حور بغيض:ما طاعت اتيي وانته اللي سويته اشوووووي
مبارك بعصبيه:جب ولا كلمه
ويحرك سيارته
مبارك ومن الخاطر معصب هو ما ينحط في هالموقف ومن هذي اللي سمها سلامه اللي تسويبه جذيه بتشوفين مب انا مبارك لو ما رديتها
وبصوت عالي:وين تبين
حور موطيه راسها :ابى ارد البيت
مبارك صد عليها بعصبيه ورد يطالع دربه :اوكييه مب منج مني انا اللي مضيع وقتي شالنج ....
.
.
.
الساعه سبع المغرب وقفوا سيارتهم في الحوش ونزلوا منها
خليفه ياي يمشي هو وبنته شوق من بيته:مرحبا مرحبا قربوا
الكل صد صووب الصوووت وهو ياي صوبهم
محمد بابتسامه:المرحب باجي
ويلسوا يسلموا على بعض
خليفه يرمس حرمة عمه:بخير ربي يعافيج ومن صوبج عساكم بخير
ام سعيد :بخير فديتك......ويه شواقي امايه اشحالج تعالي سلمي عليه
خليفه:شواقي روحي سلمي حبيبي
وراحت شوق صوب ام سعيد
شوق تجربت منها وخاشمتها وعقب مطها راشد صوبه
شوق وبسرعه وهي تضحك:هااااي ها وريو
راشد:شطوره .....ماتنسى الدرس
الكل يلس يضحك
خليفه : شو معلم بنتي تلوي لسانها ....يلا قربوا
راشد:لالا طلع ولد عمي دقه جديمة
خليفه:امشى يا الدقه اليديده
ومشى محمد وراشد صوب الميلس
خليفه :قربوا صوب الصاله هذا بيت عمكم مب بيت غرب
وكلهم دخلوا الصاله ويلسوا بس كانت ام حمد مب موجوده ويدته داخل تتعشى دايما تبى عشاها في هالوقت لانها ترقد ثمان........... واتصل خليفه حق حرمته اتيي تفول ويا ام سعيد وطرش الخدامه علشان ينزلن حور وسهيله شوووي وهن داخلات الصاله
سهيله وحور :السلام عليكم
الكل ينش:وعليكم السلام
ويتجدمن يسلمن على حرمة عمهن عقب صدن صووب محمد وراشد
محمد بابتسامه وفي خاطره ما ادري شو يشذني فيها هالانسانه يا كثر اللي شفتهن مع انهن ملكات جمال بس هيه غير عنهن قلبي تعلق فيها:اشحالكن بنات العم
حور وسهيله:بخير ربي يعافيك
سهيله : ومن صوبكم
محمد:بخير ربي يسلمج
راشد وهو يطالع سهيله : اشحالج حور
حور :ههههه تمام
سهيله :ما عليه رشوود
راشد:رشود في عينج اونه رشود دومني ايي ولا تطلعين جني ياي اشحت
خليفه:هههههه محشوم ولد العم
ودخلت منى
منى :السلام عليكم ...مرحبا الساع والله يا خالتي ما تنشين
ام سعيد توقف:افا يا ام شوق ...اشحالج حبيبتي
وبدوا يسولفون ويتفولون
حور ترمس راشد: خلاص اليوم عشاكم عندنا وبراويك الطبخ
محمد:تسلمين بنت العم مره ثانية
راشد: منوووو قال اليوم دامنا واصلين خلاها اظهر مهاراتها
ام سعيد:الله يقطع بليسك من ولد
حور: عاد شو تبى تتعشى
راشد:أكلتي المفضله
حور مبتسمه:اللي هي
راشد بابتسامه :مكرونه بالباشميل
ويرن تيلفون الصاله نشت سهيله تشله وطلعت كامله بندت عنها ....يت صوبهم
سهيله:عن اذنكم
راشد:اذنيج وياج
سهيله تصد عليه:سخيف
خليفه:سهيله
راشد يصد عليها: انتي من الدلع بتطيحين في جبد عمي ومحد بيبتشل الا انا بيتم يقولي تعال خذ بنتي فكني منها
شافوا سهيله مفوله والكل ضحك على رمسته
سهيله عصبت:مب محصله ثرني جان باخذك انته
محمد:ودر سهيله رشووود لااقووووم اكفخك
سهيله اطالع راشد بنص عين: شوف اللباقه ......وتصد على محمد بابتسامه حلوه نادره تطلع من سهيله :تسلم ولد عمي
ومشت عنهم وهم يلسوا شووووويه ودخلت ام حمد وتضايجت يوم شافتهم هلكانه ومالها بارض بس اكيد ما بينت هالشي عقب ما أخفت الضيج ورى الابتسامه والكلمات الترحيبية ...وحور نشت صوووب المطبخ من يت هنيه ما طبخت وفي خاطرها اطلع مهاراتها ويشوووفوا طباخها كيف خاصه انه البنات في العايله النادر منهن يعرف اعتمادهن على الخدامات عدا نوال اللي تهوى هالشي وتتعلم ...مع انها مضيجه كانت في حيرتها بعد موقف سلامه ومبارك الا انه يوم شافت قوووم عمها استانست ويلست تسولف ونست كل شي
الخدامات واقفات يطالعنهاا
حور اشفيهن هذيلاااا:فكتوريا انا بسوي العشا
فكتوريا:اوكييييه هور
حور :انزين ساعديني ...وما يحتاي هذيلاااا يصطفن جذيه عنبو زيغني خليهن يطلعن
أشرت لهن فكتوريا وطلعن ....ويلسن يسووون العشاء مكرونه لانه حور ما ادل أماكن الأغراض عقب شووي دخلن الخدامات بعد ماطرشتهن ام حمد يكملن العشاء اللي محددتنه وامرتهن يسووونه قبل ما تظهر
حور اطالع فكتوريا : شووو يسوووون
فكتوريا: سندويج دجاج مايونيز ودجاج تكه ودجاج نقانق
حور:اها
فكتوريا:انا بروح اسوي تبوله وفتوش وهمص انتي يريد شي
حور:لا برايج اروحي بعابل ولو بغيت بزقرج
.
وشووووي اتجمعوا كلهم ووياهم ابوحمد وحمد وتعشوا والكل مدح حور في طبخها حتى اخوانها عدى مبارك اللي ما كان موجود استانسوا انها تعرف تطبخ حلوووو.....وعقب ما راحوا
منى ترمس حور: شو هالطبخ السنع ليش مخبتنه
حور ابتسمت بخجل استحت اليوم وايد مدحوها وهالشي خلاها تستانس :تسلمين حرمة اخوووي
الكل راح لدربه منى وريلها وبنتها ساروا صوب قسمهم وحمد وابوووها راحوا يطالعون الاخبار وسهيله راحت غرفتها وامها نفس الشي وحور بعد لانها تبى ترمس سلامه تشوفها زعلانه أو لا سارت صوب غرفتها ...
.
.
سهيله تمشط شعرها جدام المرايا ما لها خاطر تسووي شي حاولت ويا امها انها تظهر ماقدرت قالت لها ما بتظهر الا بعد الامتحانات يعني ما بتشوف عبدالعزيز وهو بيزعل وايد بيقول أكييد طنشتني تاففت من الخاطر....راحت صوب شبريتها وانسدحت كان بامكانها تروح ويا حور بس حور بتروح مع البلوه مبارك اللي ما بيفج منهن ابداااا ردت تتنهد تحاول تغمض عينها وترقد
.
.
.
المكان:دبي

يوم الخميس في بيت ابو ذياب

ذياب يطالع أخته بخيته:نحن ما قلناله يخطب من عندنا وبنات يشوفهن قبل الملجه حامض على بوزه شو هالسنع
بخيته تعرف ذياب زين بس بتحاول علشان خاطر بطي وعاليه:بيشوفها متحشمه ما فيها شي خطيبها
ذياب يطالع امه:فهمي بنتج امايه كلمتي وحده وما عندي مجال للنقاش
ام ذياب ما عارفه شو تقول صدت على بنتها : يا بخيته ابووج بعد مب راضي لا اتمين تحنين
ذياب يوقف ويرمس بخيته: سمعي عدل يا بخيته قولي له ما عندنا بنت يشوفها قبل الملجه يبى مرحبيبه نحن من زمان ما يبى الف ريال غيره وهذي كلمتي وما عندي غيرها
ومشى عنهن صوووب داخل
بخيته تصد على امها: انزين شوفيها امايه
ام ذياب:من متى نراوي بناتنا قبل العرس يا بنيه انا اقول شرات رمست ذياب وابووه خل عنج قوليله هالرمسه جان يبى يطالع البنت قبل ما يملج ياخذ غير عالية
بخيته مبوزه ماقدرت عليهم هلها اطباعهم ما تغير
ام ذياب:قومي شوفي بناتج ما اشوفهن هنيه
بخيته :خلهن يولن هذيلا بعد
ام ذياب:وابوويه على رمستج الماصخه يولن اونه قومي طالعي بناتج الله يهديج
بخيته:ان شاء الله أميه

نشت وراحت تشوووف بناتها........

في غرفة عاليه
واقف على الباب يطالعهن
نوف: اشفيكم ذياب تصارخون انته وبخوووت شووو استوى
ذياب:اونج ما تعرفين السالفه وانتي رادار البيت
عاليه :ههههه
نوف بوزت:ضحكتي بلا ضروس
عاليه تصد على ذياب : شو قلت لبخيته
ذياب يطالعها ومركز عليها : شو تتوقعيني اقولها اكيد لا والا انتي عندج رمسه ثانية
عاليه اطالعه: شو رايي بعد لو انته وابوويه وافقتوا انا مب موافقه
ابتسم ذياب من الخاطر لاخته :نسيتني شو ياي اقولكن
نوف:عسى خير
ذياب: شي بتستانسن عليه وايد
عاليه:حمستنا اشعندك
ذياب بابتسامه عذبه وغمز لهن :ما تبن تروحن العين
عاليه ونوف نطن مره وحده:احلف
ذياب: شو ثرني ضاري اكذب عليكن
عاليه: سوري مب قصدنا بس من الفرحه متى بنروح
ذياب: الحين بس سيف ما يقدر يروح ما ادري شعنده
نوف بدلع:احسن
ذياب:جب انتي هي سيارتج ودري عنج الدلع اخاف باجر عقب ما يملج عليج ينسيج هلج ولا تعرفينا
نوف: يخسي الا هو
ذياب: يا ربي يا لسانها هالبنيه متبري منها حشمي اقولج والا بنسير عنج انا وعالية
نوف تحط ايدها في ثمها : انطمينا
ذياب: ابرك لج جذيه
عاليه اطالعه بابتسامه ومكر:والا اقول ترى حور بتيي الويكند الياي ما يحتاي انروح
ذياب بيموت غيض منها هو يبى يشوف حور صح يت المره الماضيه بس ما شافها وبمكر اكبر:خلاص عيل ما يحتاااي انروح دامها بتيكن حور صدقج عاليه ...بسير ارمس يوسف بنظهر رباعه
ويبى يطلع من الحيرة
يصرخن عليه :لالالالالالالا بنروح
يصد عليهن مبتسم:دامها بتي الاسبوع الياي ما يحتاي اشله تروحن.... الحين فكرت فيها السالفه خلاص
عاليه: يلا عاد ذيوبي نبى نروح
ذياب: يا شين الدلع من ثمج ذيوبي اونه
نوف:هههههههههه .....وحصلت ضربه على راسها من عاليه
نوف :ااااي ...سويتي لي ارتجاج في المخ
ذياب: انا بروح اتزهب واتكشخ وانتن خلصني
نوف:الله وأكبر وانته الحين ما متكشخ لو تكشخ شوووو بتسوى ببنات العين
ذياب استانس من مدح اخته احيانا يطلع منها شي حلووو وفي خاطره عيل حور ليش ما تحس :ااااه لو يحسووون بس
نوف عاقده حياتها :من
ذياب كشر في ويها:مالج خص ...بسرعه تزهبن ....وطلع
نوف تصد على عاليه: منوووو يقصد لا يكون ذياب حاط عينه على حد من العين
عاليه ترفع جتوفها:أي دونت نوووو
ويلسوا الجماعه يتزهبوووون وقالوا لامهم وابوووهم
وقبل ما يظهرون عند الباب الرئيسي

بخيته واقفه عند باب الصاله:ذياب
ذياب يصد عليها ويرمس عاليه :دقي على حور خبريها ان ياين صوبهم
وراح صوب اخته وتم يطالعها زعلان منها
.
.
عاليه ونوف ركبن السياره ودقت عاليه تيلفون لحور واستانست من الخاطر وهالشي عاليه عرفته من نبرة صووووتها
حور: قولي والله....مرحبابكم من تشتلوا لين توصلون العين
عاليه:المرحب باجي......بني انا ونوفوه وذياب
حور: نادر ما تطلع من ذياب ومن الخاطر يسلم لي ولد خالتي فديته صدق فرحاااااانه
عاليه:شو شووووو فديته هذي بعد من متى صرنا أحباب وسمن على عسل نحن وذياب
حور:عاليووووه لا يروح فكرج بعيد لاني مستانسه لانه هو اللي يابكن صوبي طلعت بعفويه خل عنج المصاخه
شوووي ايي ذياب ويركب السياره
عاليه:اوكيييه حور ها ياى ذياب........... الآن سو ننطلق..هههههه
حور:هههههههه نحن بالانتظار
عاليه:مع السلامه
حور:في حفظ الرحمن .......وبندت عنها
عاليه تصد عليه واطالعه:يلا ذيااب اشفيك اطالعني بندوا
ذياب: ادري ...فجي الجامه اشووف سيف ياي صوبنا
عالية تفج الجامه
سيف: ما شاء الله العربان اتزهبوااا
ذياب:هيه والله ما بتخاوينا
سيف: الصبح دق لي حمد يقول بيخطف عليه لانه بيي دبي ما يصير هو ياي عندي وانا اروح لحد الحين ما وصل
ذياب:هيه شي طيب
سيف بابتسامه ومكر:لالا ما عندكم حق وينها خطيبتي لا تقولون ما شليتوها بخبص ويهك ذياب تراني انته وعلووووي
ذياب وعاليه:ههههههههه
نوف: احلف بس انته
سيف:اف اف هنيه نووفتي وانا ما شفتها
ذياب:اجلب ويهك اونه نوفتي سير لا ادوسك على بطنك بالسياره الحين
سيف يبتعد عنهم وهو يضحك واشر لهم بمعنى مع السلامه
مشوووا واستانسوا وايد ارتبشوا بالاغاني والسوالف لحد ما وصلوا العين
.
.
.
رحبوا بهم دخلن البنات داخل وراح ذياب وعنده ابوحمد ومبارك صوب الميالس وفولوهم ورحبوا بهم وتمواااا يسولفووووون
لحد ما أذن المغرب وراحوا يصلووووون وعقب ردوا
حور توقف: بروح اسلم على ذياب شفت ابوووي دخل ومبارك عند الباب الرئيسي يسولف ويا سعيد ولد عمي
نوف: ولو كانوا هناك شوفيها يعني
حور: يعني ما يعيبهم يا أخت نوف وعيب
نوف: اهاااااااا
وطلعت حور عنهن
نوف: علوووي حلوه حيرة حور صح
عاليه:هيه حلوه وايد
نوف:كل شي في بيتهم حلووو يا ليت عندنا بيت شراتهم
عاليه اطالعها بنص عين: شي قاصرنج في بيتنا الشيخه
نوف استحت:لا
عاليه: عيل انطمي ...صدق صدمتني رمست ذياب اسبوعين عن الملجه لالا جريب وايد
نوف :ما سمعتكم عدل شو قال ذياب
عاليه:قال اونه بخيته دقت لاحمد وخبرته ودق لابووويه واستسمح منه وحددوا موعد الملجه تكون بعد اسبوعين
نوف:ول مسرع اللي استووووى....بيكونن امتحانات الله يغربل بليسك يا بطي
عاليه: بس هالبطي موقفه سخيف شو يعني بكون جيكره علشان حضرته يبى يشوفني
نوف: صدقه يضمن اللي ياخذها
عاليه:مالت عليج انتي وياه
.
.
خذت نفس عميق وغطت شعرها زين
ودخلت :السلام عليكم
ذياب صد على الباب ووقف:وعليكم السلام
حور: اشحالك ذياب
ذياب يطالعها:الحمد الله اشحالج انتي
حور : بخير بشوفتكم
ذياب ابتسم:عاد لا تقولي بشوفتكم بشوفتي بس
حور:ول عليك انا ناطه اسلم عليك وانته تبى تناقرني
ذياب: يا ختي عاده فيني من اشوفج احب اناقرج شو اسووي بعمري اقترحي
حور :روح عند دكتور
ذياب يطالعها بنظره خلت حور تنحرج اشفيه ذا يطالع جذيه :ما شي دكتور يعالجني والا رحت له من زمان وفكني من العذاب
حور تبى تغير الموضوع ما مطمنه من رمست ذياب : علوم شغلك والاهل
ذياب يبتسم: يسلمون عليج وايد ويقولون مشتاقين
حور اشفيه هذا ........عادته ينرفز بس ما توصل لين هالرمسه الحبيب رايق
حور: عن اذنك ذياب
ذياب في خاطره ما شبعت منج وين رايحه :ما سولفنا وياج
حور :لا علشان ايي مبارك يمطني من شعري زين اني ييت وجازفت علشااان اسلم
ابتسم لها ذياب من الخاطر :تسلمين
حور صدت بسرعه وراحت تركض قبل لا ايي مبارك واصلاااا هيه اليوم صدق منحرجه من ذيابوووه غريبه ...شافت سعيد يبى يروح ومبارك بيرد صوووب الميالس ........لفت صوووب المطبخ ودخلته قبل ما يشوفها مبارك

اول ما وصلت الحيرة
حور : زين انه مبارك ما شافني
عاليه: يعني سويتي مغامره وكله علشان ذياب
حور اطالعها بنص:شو سالفتج انتي اليوووم شووو وراج
عاليه ببراءة:اناااااا .......وتفج ايدها :ما عندي شي شوووفي
حور : بايخه....... اشفيكم انتي واخووج صاير دمكم ثجيل
عاليه:ههههه جيه شو قالج اخوووي فديته
حور اطالعها بنص عين :والله انج شو اقول بس مالج خص
ومرت ربع ساااعه عقب دق ذياب لعاليه انهن يطلعن بيروحن وطلعن البنات وحصلن في دربهن اليده
ام عبيد:وين بتروحن
عاليه: بنروح ديارنا يدوه
ام عبيد: افا وين بتتعشوا عندنا حور اسميج ما تعرفين السنع انتي وحرمة ابوووج
حور:ما طاعوا يدوووه شووو اسويبهم
عاليه مبتسمه:مره ثانية الغالية ....وراحت حبتها على الراس ونفس الشي نوف ......وطلعن
عند الباب
عاليه: سلمي على ام حمد وختج حور
حور مفتشله من ختها وامها يلسن شووي اول ما يوا عقب ما شافوهن:ان شاء الله ما ادريبهن وين راحن
وسلموا على بعضهم وراحوا هل دبي صوووب ديارهم وذياااب مستانس بالحيل شاااااف حور وحاول يفج وياها بالرمسه مجرد محاوله
في السيارة
عاليه:الله يديم الوناسه
ذياب يصد عليها مبتسم :آمييين ادعيلي من قلبج
عاليه: شو قلت لهم الناس اللي شفتهم
ذياب يصد على نوف حصلها راقده :هم شوو قالوا لج
عاليه:ماشي بس قالوا ثقالة دم شووو سويت
ذياب:هههههه عنبوو نبى نسمع كلمه حلوه منهم وهم مايحنون
عاليه بفضول:جيه انته شو قلت
رن تيلفون ذياب صد عليها:اولا ما يخصج وثانيا جب بكلم الريال
ويلس يكلم ربيعه في التيلفون