الحلقة التاسعة
المكان : دبي
يوم الخميس في السياره وهيه زعلانه وماده بوزها تتغلى عليه وهو مب من عادته يدلع البنات بس مسوي لها سالفه وعاطنها ويهه ويالس يراضي فيها
حمد يصد على حور : خلاص حور عن الدلع من الصبح معطنج ويه تراني
حور تصد عليه باستنكار : بعد فوق اللي سويته يالس تهزبني
حمد يطالع الدرب: اللي ما يعرف بيقول جتلت حد
حورتتحرطم : انا من الساعه ثمان اوعي فيك وانته مب راضي تنش والحين 11 وشي
حمد : انزين خلاص يا بنت الناس فكينا دبي الا شبر ونوصلها بس تراج حنانه طالعه لمنوو
حور صدت عليه وتمت اطالعه صدق متغيضه منه عاد هيه اليوم ما بتبات عندهم لانه ابوها موصنها ترجع باجر بيروحون هم وقوم عمومتها المزرعة
حمد بجديه : حور هالمره ما بتغدا عند قوم خالتج
حور باستغراب نست انها زعلانه : ليش؟
حمد ويصد عليها عقب يطالع دربه : شو ليش فشله كل اسبوع تغدينا عندهم يا ويه استح
حور هيه اطالعه : عااادي والله هم يستانسون يوم يشوفنا
حمد وهو مصر: انتي بنتهم بس أنا لا بصراحه فضيحه كل اسبوع غزيناهم......بنخطف على مطعم وبنشتري غدا وبنسير نتغدا في بيتكم ويا سيف اوكييييه
وشووويه يرن تيلفون حور ..وطلعته من الشنطه وشافت الشاشه وردت اطالع حمد
حمد يطالعها ويرد يطالع دربه : منوو
حور مبوزه بدلع : عاليه بنت خالتي اكيد يتريونا بصراحه فشله حمد شو اقولها
حمد : شو شو تقولينها بعد أنا ما بتغدى عندهم ومصر على رايي
ردت حور على التيلفون
.
عاليه : وينج انتي عنه من الصبح اتصل
حور: اول سلمي
عالية : السلام عليج ..والحين وينج تاخرتي لا تقولين بعدج في العين
حور: لا نحن في الدرب شووي وبنوصل
عاليه بلهجه لبنانيه: عجلي اوليك اليوم مسوتلك غدا انما ايه بيعئد ...وجلبت اماراتي : لو تأخرتي باكله عنج ولاني حقيره ما بخلي لج شي
حور انحرجت واطالعت حمد مب عارفه شو تقولها : حلال عليج الغاليه
عاليه استغربت ردها : لا ما يهون عليه اكله عنج
حور تورطت ما عارفه ترمس واطالع حمد وهو مصر انه ما يتغدا مفتشل كل ويكند ايونهم وهم عاد يعبلون على عمرهم ويذبحون وما يقصرون في الغدا
حور: صبري شووي علووي
وتغطي بايدها على التيلفون : حمد ما اعرف شوو اقوول استحي بصراحه
حمد : شو تستحين قولي لها ما بنتغدا تراني برد العين عنج
حور بزعل : هيه منيه اخ حمد برايك رد الود ودي اتم هنيه وانته عارف اني ما احب اكون عاله على حد بس ابوي الله يهديه اللي ما رضى
حمد استغرب وانصدم الحين كل مره نقوولها شي تحسسنا انها هيه المسجينه ونحن الغلطانين غلطت ابوي انه ودرها تذكرنا فيها كل ساعه ...ما عارف كيف يرد عليها حس انه استحملها وايد سهيله اخته الخليصه مب مسولها سالفه
حور حست بغلطتها وردت تكلم عاليه : برايج علوووي..... اوكييه.... مع السلامه ...
وبندت عنها ولا اهتمت بالرمسه اللي تقولها عاليه .....
صدت على حمد وتمت اطالعه عضت على شفايفها: اسفه حمد
.
وهو ساكت والشرر يتطاير من عيونه ومب لهدرجه اخوانه حتى خليفه اللي معرس وعنده عيال ما يتجرأ يرد عليه اتي وحده مفعوصه تجرحه برمستها وتضحك عليه
حور بعدها اطالعه : والله اني ندمت على اللي قلته... بليز سامحني لا تزعل
حمد عطاها اكبر طاف ولا متاثر بأي كلمه قالتها وهالشي واضح على ويهه
حور بدت تحزن وتحس عمرها بتصيح ما لقت تزعل غير اللي تحسه احسن واحد في البيت واحن واحد لها ...رغم انها في البدايه شكت في طيبته والوحيد اللي يساندها ومآزرنها من اخوانها : لا اتم ساكت جذيه صدق بصيح
حمد معصب ومب طايق يسمع صوتها : حــــــــــــــــــور جب ولا كلمه ما ابى اسمع صوتج ولا نصخ تفهمين
حور بعد ما سمعته وادركت من نبرة صووته انه معصب عدلت يلستهااا وسكتت واجبرت دموعها ما تنزل جداامه
.
.
في المطبخ في بيت ابوذياب يالسات يعابلن في الغدا
ام ذياب تصد على عاليه : اشفيج ما تسمعيني شو قلت روحي حطي العصير في الثلاجه
عاليه مستغربه من تصرف حور شو استوالها بندت فجأة وبسرعه الله يستر بس : ها ...انزين
ام ذياب تصد على بنتها: اشفيج رمستي حور وينهم الحين
عاليةشاله العصيرفي ايدها : في الدرب يايين امايه
ام ذياب: منو يايبنها
عاليه : ما ظني غير أخوها حمد نفس كل مره امايه...وتحط العصير في الثلاجه
وشوووي ويدخل عليهم ذياب هو توه ناش من الرقاد : صباح الخير
عاليه : قول مساء الخير صارت 12 وشي
ذياب يضربها على الراس ويسير يحب امه فوق الراس
ام ذياب :الله يصبحك بالخير والعافيه فديتك ...وهو اكتفى بالابتسامه
عاليه : ااااااااي يعلك ....
ذياب يرد صوب عاليه : لا تدعين تراج بتحصلين كفخه ثانية على راسج
عالية اطالعه بتافف: بسم الله ناش فلفل غاوي اتكفخ يا الدب
ذياب ويفج الثلاجه ويطلع العصير: الدب في عينج ...انتي اطولين وسامه وجسم وهيبه ....ويطالعها من فوق لتحت : يا العصا
عالية اطالع عمرها هيه ضعيفه وايد وتبى تمتن شوووي طولها زين لا قصيرة ولا طويله بس ويها مغزز مب ضعيف وهالشي محلنها ومهون عليها هيه غير عن نوف اللي طولها تقريبا نفس عاليه وجسمها حلو متوسط ما يحتاي تزداد ولا تضعف أكثر من جيه ويها مطاول وعليها بياض لدرجه يتحرون أمها مب مواطنه اجنبية : انا العصا بتشوف بعد شهر... الحين وصفوا لي دوى يمتن بيصير جسمي ترتوب .......وتمشي بدلع والابتسامه شاقه الحلج
ذياب يضحك: اخافج عقب تستوين بوتمبه ما ادخلين من الباب
عالية انقهرت: بوتمبه في عينك
ذياب يفج الثلاجه ويطلع العصير منها
عاليه : لا تشربه مسوينه حق الضيوف
ام ذياب مشغوله في الغدا : لو شرب كووب شو بيضر بعد انتي
ذياب يطالعها ويطلع كوب من الرف ويصب له : من مسونه
عاليه بفخر: انا
ذياب يشرب العصير مره وحده عقب ما خلص : اشوف طعمه مره مب حلو
عاليه اطالعه : اصلاا انته واحيت تتذوقه عقيته مره وحده جنك تشرب دوى
ام ذياب: عاليوه تعالي قطعي الخضره بدل ما يالسه تناقرين اخووج وماذتنه
عاليه تحط ايدها على راسها : الله واكبر ....بس شو نقول لنا الله
ذياب يبى يسأل عن حور ما وصلت لحد الحين غريبه هالمره تاخرت مب من العاده: الا جنهم تأخروا هل العين
عاليه تصد صووبه واطالعه باستهبال : منووو
ذياب في خاطره ناقص سخافتج انتي بعد : اقول هل العين تأخروا دقيتوا عليهم
عاليه ا: اهاااا ........وترد تقطع الخضره : هيه دقينا
ذياب استغاض منها ليش ترمسه جذيه والغيض ترمس بالقطاره ويغايضهافي رمستها : شووو اهااا هذي بعد
عاليه اطالعه ببراءة : شو فيها بعد هذي
ذياب راح صوبها منقهر من برود ردها ومستغرب من لهجتهااليديده شو سالفتها هالبنية
عاليه تشرد صووب امها : امايه دخيلج قوليله
ام ذياب مشغوله وما لها بارض حقهم: ذياب اطلع برا ما ادري شو مقعدنك في المطبخ يلا اطلع خلها اتكمل شغلها
عالية تاشر بايد وده لفوق: ظهر الحق وزهق الباطل
ذياب راص على اسنانه متغيض من عاليه واطالعها بتهديد ويأشر بايده بمعنى بتشوفين
وهيه مكشخه ضروسها ومستانسه ...وهو طلع عنهم وفوق هذا معصب حور لحد الحين ما وصلت وفي خاطره يا ربي شو مسويتلي هالياهل خلتني جيه اتخبل عليها
.
.
وقف سيارته جدام باب بيتهم وهو ولا نطق ولا كلمه مع انها ردت تذكره بالغدا علشان ترضيه علشان يخطف المطعم بس ما رد عليها ويالس ينافخ من الضيج...
حمد صد صوبها بعصبيه : ليش ما تنزلين
حور اطالعه بخووف وزعل: وانته ليش ما بتنزل
حمد ما صد صوبها ولا حفلها : لا .. يلا نزلي
حور اطالعه بترجي : يلا حمد لاتزعل والله ما تهون عليه واعترفت اني غلطانه
حمد صد صوبها وبضيج واصرار : بتنزلين والا اردج نكس العين الحين
حور تغشت وتفتح الباب تنزل
صدت عليه ما هاين عليها ما تعرف كيف هالمخلوق مسرع ما احتل مكانه في قلبها وحست برابط الاخوة امبينهم هيه كانت تتمنى اخوو شرات حمد حازم واكبر عنها بوايد بس مكانة سيف محد بيحتلها : انزين خبرني وين بتروح
حمد وعينه اطالع جدامه : يوم تخلصين سووي لدريولج ....يصد عليها وياشر على عمره: اللي هو أنا اييج... تعرفين انج ما بتباتين هذي اوامر ابووي لانه باجر كلنا بنروح المزرعه ......الحين ممكن تسكرين الباب
حور تبند الباب وهو حرك سيارته وراح
مشت صووب بيتهم ودقت الجرس ويلست عشر دقايق محد فتح قالت اكيد سيف راح يصلي المسيد لانه الساعه 12 ونص وزود عقب سارت صوب بيت خالتها ...دقت الجرس حصلت الباب مفتوح
دخلت الحوش وشافت ذياب واقف عند باب الصاله
حور تسير صوبه تحس عمرها من زمان ما شافته هيه من بعد أخر مره هزبها فيها ما رمسته هيه تدري انه عنده حق لانه ابوها وهيه متعوده من ذياب جذيه بس فشلها جداهم وخاصه انه حمد كان موجود : السلام عليكم
ذياب فرحان بس في خاطره ومب مبين على ويه شي : وعليكم السلام
هلا حور قربي .........ويتجدم ساير صووب الباب
حور صدت صوبه: لا تطلع ذياب حمد راح
ذياب يصد عليها مستغرب: افااا وين راح
حور ترددت ما عرفت شو تقووله بس حصلت وبسرعه : عازمنه ربيعه على الغدااا
ذياب يهز راسه : هيه شي طيب
حور تمشي وتدخل داخل حصلت نوف ويلست تسلم عليها ودخلن صوب المطبخ
وهو واقف يطالع باب الصاله غريبه ما خازت الغشى من دخلت من الباب ما طالع ويها مشتاق لها الويكند الماضي ما شافها واليوم شافها وسمع صووتها من شهرين وزود ما ترمسه زين نست ورضت علينا تافف من هالمخلوقه اللي مصره تحوز تفكيره من يصدق انه ذياب يبى حور بالنسبة لهم ما تدخل العقل
في حيرة عاليه يالسه حور ونوف وعاليه يسولفن وياخذن علوم بعض عقب ما سلمت حور على خالتها
عاليه اطالعها بتشكك : اشفيج حور
حور تتصنع انها مافيها شي : ما شي ...وتصد على نوف: ها شو اول ثانوي
نوف فرحانه بشوفت حور: ترتوب لحد الحين...بس تونا نقول يا هادي
حور مبتسمه لها : الله يوفقج الغاليه
عاليه اطالع ختها: نوافي سيري ييبي العصير
نوف تقوم واقفه : اوكييييييه
عاليه اطالع حور بتفحص وحور صدت صوبها : اشفيج
عاليهاطالعها بنص عين: اشفيني انا اسالي عمرج
حور سكتت عنها تعرف انه عاليه دايما تكشفها وفاهمتنها عدل
عاليه تتقرب منها : رمسي قبل ما اتيي نوف اسمعج
حور اطالعهااا عقب يلست تخبرها باللي صار
عاليه بانزعاج : حور وبعدين من طولت لسانج هذي.... جذيه ما يصير
حور انفجت مره وحد وتمت تصيح بحراره استغربت عاليه
عاليه : حور
حور ترفع راسها : ادري اني الغلطانه والله ادري اني صايره عصبيه وما انطاق امشي واغلط....بس صدقيني اتعذرت من ابوويه وصالحته وحاولت اتقرب من اخواني بس هم يرفضون هالشي وخاصه سهيله.... ومبارك على الحركه اللي سواها ما اقدر اسامحه بصراحه الحين كملت اسبوع وسلامه ما ترد على تيلفوناتي وما باقي الا حمد هو الوحيد غيييييييير عنهم لانه خليفه اروحه لاهي بحياته ومرته وبنته
عاليه : هيه وحمد اليوم عطيتيه نصيبه صح
حور: تاسفت انتي ما تدرين كيف حبيته هالانسان احسه شي وله هيبته في البيت وفرحت انه هالشخص اللي مساندني ... ومساندته حطت لي مكانه في البيت غصين عنهم كلهم حتى امه
عاليه تبتسم تحاول تهديها : انزين هو وين راح الحين
حور: ما ادري
عاليه : بس خقاق تراه والا شو فضيحه بعد ترانا اهل
حور: صدقه علوووي كل ويكند
عاليه تضربها على جتفها: يا مصاختج انتي واخووج ...ها شو الأوضاع عندكم هناك
حور تعدل يلستها واطالعها :الله يسلمج ابوي راضيته والامور وياه زينه وحمد نفس ما قلت لج فنان
عاليه تضحك: يالهحمد اللي حشرتيني عليه فهمنا فهمنا تراني الحين بروح اخبر سيف
حور بنظرة حنان : شو تخبرين تظنين سيف حد يسواه في قلبي
عاليه تبتسم :الله يخليكم لبعض
حور: امييييين ...ومنى فديت قلبها حبوبه واستانست انها حامل وبنتها هذي اللي تخبلبي من حلاتها طالعه على ابوها
عالية : يالمدحه تمدح حلاة خوانهاااا تراه حتى انا اخووي يموتن عليه البنات
حور تبسم : عاااد ذيابووه سكتي عنه عنلاته كل مره يزداد حلاه لو هالحلاه في بنيه
عاليه : اه يا قلبي حور تمدح ذياب لا ما اصدق
حور: خلي عنج هالرمسه ....ردينا لخواني في ذمتي ما شاء الله عليهم حلووين طبعا حمد ماخذ الزين كله
ابتسمت عاليه لها من كثر ما تمدح فيه وهيه توها مزعلتنه
حور تكمل رمستها: والثاني بروك هذا كريهه واللي سواه ويا سلامه ما اقدر اسامحه عليه عقب خليفه فديته طيوب كافي خيره شره
عالية: واختج وامهاااااا
حور: تعنين بالحلاه
عاليه : لا كيف معاملتهن وياااج
حور: بيني وبينهن اكبـــــــــــــــــر طااف ولا كني موجوده وتصدقين هالشي مريحني وايد
عاليه : اهااااااا زين يوم بديتي تتعايشين وياهم وتاخذين على جوهم
حور: بس ملل في ملل الصبح ارقد الغدا ما يجتمعون كلهم ابدا ونفس الشي العشا بس برايهم بدت اتعود وطبعا يدتي فديتها طيبه ما ادري ليش رفضت امايه كنت اتحراها شريره وقوويه بس حصلتها لا صح لسانها ما شاء الله وتمشي رمستها بس حبابه بس اضحكني علاقتها ويا حرمة ابووي
عالية مستانسه وهيه تسمع عنهااا
حور: بس ما نظهر نروح عند عمومتي بس ابوووي امس قال تصدقين انه بنروح وياهم المزرعه وهم ما ظهروا رباعه تقريبا من ست سنين
عاليه : خيبه ليش جذيه
حور تهز كتفها : ما ادريبهم بس جنها بترد علاقتهم وابووي مستانس بروحت المزرعه باجر ويا اخوانه
عاليه : الله يديم وناسته
حور مبتسمه : ان شاء الله ....ها شخباركم انتوا
عاليه بلهجه مصريه: ما فيش حاجه اولها انا اولك اخبرنا بالتيلفون اول باول
حور : شو استعملتي الدوى اللي قالت لج عنه ربيعتج علشان تمتنين
شووووي ترااج يابوسه
عاليه : حرام بتعقديني انتي وذياب النتيجه بتظهر عقب شهر
حور: هههههههه انا اللي يجتلني جسم نوفوه
عاليه :هههههه من طلعت اتيب العصير ما ضووت اشفيها تأخرت
نوف تدخل بالعصير
حور وعاليه :ههههههههههه
نوف: اشفيكن
عاليه : يبنا صيرت القط يى ينط
نوف وهيه شاله الصينيه لبستها وصدت على حور: حور سيف في الصاله
عاليه : عيل ودي العصير هناك الحين بنطلع
حور توقف : ذياب في الصاله
نوف: هيه
حور تعدل شيلتها وترد الغشى على ويها استغربن عاليه ونوف وتمن يطالعن بعض
عاليه مستغربه : ليش تغشيتي
حور : لانه اخووج في الصاله واخواني وابووي محرصين عليه ما اظهر جدام غريب
عاليه من صدقها هذي: لا والله
حور ومن صدقها وهيه مقتنعه بهالشي: هيه والله
نوف مب مصدقه وفي ويها ابتسامه : عاد من ذياب حافظ في ويهج كل شي اظني
حور :بليييز خلني على راحتي ممكن وهالشي اقنعت به خلااااص
مشت تظهر تسلم على اخوها وتبعتها عاليه ونوف راحت صوب المطبخ وهن في قمة الاندهاش ما توقعن في يوم من الايام حور تتغشى من ذياب... عااااااد ذياب
حور تدخل الصاله وهناك ذياب وسيف يالسين : السلام عليكم
سيف وذياب يطالعون بعض وينش سيف : وعليكم السلام ....ويروح يسلم عليها مستغرب انها متغشيه بس ما قال شي ويلست عدال سيف من الصوب الثاني وذياااب مية الف علامه استفهام في ويهه ويطالع عاليه اللي داخله توها الصاله يباها تفسرله... اشرت له بعينها
وقااام : عن اذنكم
وطلعوا هو وعاليه ......صد سيف على حور: انتي ليش متغشيه
حور ما عارفه شو ترد تعرف سيف : ذياب
سيف مستغرب هذي حور والا بدلوها : اشفيج الحين تبين تتغشين عن ذياب
حور: سيف خلاص لا تكبر السالفه انا اقتنعت باللي اسوويه
سيف ما في عليها تبى تتغشى برايها بس يعرف حور مب ويه غشى : جذيه بتحرجين ذياب ونحن في بيتهم وبعدين خواته ما يتغشن عني شو هالمصاخه حور
حور: هن كيفهن وانا ابوي اقنعني بصراحه وهو ما يرضى اطلع بدون غشى حتى لو جدام ذياب
وتدخل عليهم نوف وتحط العصير
سيف يطالعها : نوف
نوف توقف : خير
سيف يبى يطفربها : جلبي ويهج
حور :ههههههه حركات يا السخيف
نوف تهز راسها : ما عندك سالفه .....وراحت عنه
.
.
ذياب يطالع اخته وعاقد ايديه : لا والله اونها تتغشى عني
عاليه وهيه تبى تضحك : هيه وانته ليش مضايج كيفهاا
ذياب بيموت من الغيض والقهر حور تتغشى عنه
عاليه : خبرني ليش محتر جذيه خلها بكيفها
ذياب من القهر : عيل بيلس على قلبها اونه غشى جان ما يازت لها القعده ويايه لا تقعد تسير عند اهلها
وطلع من الحيرة وسار الصاله وحصل حور وسيف ودخلواا هو وعاليه
ذياب بعد ما يلس : الا اقول الأخت حور شخبار الاهل
حور مستغربه من طريقة كلامه وعاليه بغت تموت من الضحك بس صدت علشان محد يشوفها وسيف هو الثاني في خاطره ينقع من الضحك يعرف ذياب ويعرف حور زين ما زين الحين بتشب الحرب
ذياب: الاخت حور ها شخبار الوالد والاهل عساهم بخير
حور اطالعه : عن الطنازه ذياب لو سمحت
ذياب وميت غيض ويحاول يظهر انه هادي ولا فيه شي: شو طنازته بعد ليش عصبتي
حور : برايك اطنز ما برد عليك
تدخل ام ذياب وفجت حلجها اطالع حور واستغربت انها متغشيه
حور انحرجت صدق هالشي ما يركب عندهم هنيه وذياب هيه متربيه وياه صدق سخافه بس هيه لازم تتعود على هلها هناك.... بس والله مب راكبه عليها
خوزت الغشى عن ويها وهيه مفتشله ... وهنيه الكل نقع ضحك عدا ام ذياب اللي مب فاهمه شي
ام ذياب: اشفيكم
عاليه تضحك: لا لا ما شي امايه شو كنتي تبين
ام ذياب: يايه اسال حور اخوج وينه ما بيتغدا عندنا
حور منحرجه وويها احمر من الفشيله صدق الرزانه مب لايقه عليها وهيه متعوده من يوم صغيره على هالحياه ومن الصعبه تغيرها بسهوله : لا خالتي بيتغدا عند ربيعه
ام ذياب:براحته ...واطالع ذياب وعاليه: ذياب دق على ابوك شوفه وين وعاليه تعالي ويايه المطبخ
وطلعت ام ذياب وتبعتها عاليه
ذياب بعده يضحك علشان يقهرها : عن اذنج الاخت حور
حور ويه احمر وادلع لسانها : سخييف انزين
ذياب : ههههههه ....ويهز راسه : يــــــــاهل
طلع ذياب عنهم وبيخلوهم علشان ياخذون راحتهم وياخذون علوم بعض
حور تصد على سيف : عيبك جيه وانته وياهم تضحك
سيف : يوم عقب يوم اقول حور بتعقل وانتي الله يهديج ياهل اممممره ما تعقلين
حور اروحها تبى تضحك على الموقف اللي سوته : خلاص انزين غير الموضوع شخبارك انته شو سويت من رحت عنك ذاك الاسبوع
سيف ابتسم كل اسبوع تسأله نفس السؤال بس هالاسبوع استوى حدث مهم لازم حور تعرفه : حور
حور اطالعه : نعم
سيف: بعرس
حور مستغربه منصدمه وطلعت في بالها مية فكره وفكره : شووووو
سيف: لا اتمين اطالعيني جذيه بخبرج شوو السالفه...
حور يلست تسمعه وهيه مستغربه من الرمسه ومب عارفه شو ترد
وبعد ما خلص: وانته وافقت سيف انته صغير على العرس وبعدين ...نزلت راسها: من توفى وامي وابووي ما استوى ثلاثة اشهر
سيف يعرف انه من الصعب يمحي الحزن من قلبه كل ما انطرى اسمهم او اتذكرهم بس هالشي الله اللي كتبه : ادري بس خالتي تباني املج الحين والعرس بعدين بس ملجه بدون اي حفله او لمه
حور ما تعرف شو تقول: وانته شوو رايك في الموضوع
سيف : مستحيل اقول ما ابى بنتكم وهم عارضين عليه الا علشان راحتي وخالتي تتطمن عليه شو تبيني اسووي
حور: جذيه حددوا مصيرك يا سيف هذا ارتباط يوم ما تباها ما يصير جذيه بتضرها وبتضر نفسك
سيف عارف انه كلام اخته صح : بس هذي بنت خالتي وليش ارفضها هيه ما تنرفض
حور : انزين مب جنها صغيرها توها اول ثانوي
سيف اضايج : ما ادري حور هم اللي قالوا لي شوووووو اقول خبريني ايلس اتحجج علشان يقولون ما يبى بنتنا
حور: صراحه ما اتخيل انته ونوف
سيف يصد عنها : عااد هالبزيه وتعرفيني ما احب ادلع البنات
حور مبتسمه : عدا حور حبيبة قلبك مب صح
سيف مبتسم : يا الواثقة انت غيييييير
حور: اخااف باجر تحتل نوفو مكاني صدق بكرهها
سيف:هههههه والخيبه بتكرهينها مره وحده
حور اطالعه بنص عين :وشووف الحركات المغايض وهالسوالف
سيف: ما عندج مونه تعرفيني انا وياها من يووم صغار وهيه ما تصبر عن طولت اللسان عليج اممممره تقلدج
حور: هههههههه فديتها حرمة اخووي
حور: سكتي الله يخليج بس
حور بعدها مب متخيله انه سيف يعرس بهالسن : انزين هيه تعرف بالموضوع
سيف: لحد الحين ما قالوا لها
حور تهز راسها الله يستر نوف ما اظني بتوافق بسهوله عنيده ومعقوله يملجون بنوف قبل حتى ما تملج عاليه اللي من ثلاث سنين مخطوبه ...الله يعين شو اللي بيستوووي
.
.
.
المكان: العين
في مكتب اخوها ماخذه راحتها هو مب موجود اليووم فكرت وايد برمسة عبدالعزيز والحين اقتنعت لازم تتقرب منه علشان تعرف نيته والا كيف تحكم عليه جذيه وهو قال بيخطبها وبيزوجها وهوالا نت لو ما ارتاحت له بتقطع علاقتها به ولاجنه شي مستوووي وهذي اول محادثه بينهم في الماسنجر حق الرساله اللي طرشتها له
عبدالعزيز:
اكيد اخوج حمد محد وين راح
سهيلة :
دبي والا ما بدخل النت لو موجود
عبدالعزيز:
شخبار الدراسه ابى حرمتي ذكيه وشطوره
سهيله مبتسمة مصدقه عمرها :
عيل انا ما احب الدراسه شرايك؟
عبدالعزيز:
كيفها القمر طز في الدراسه وسنينها اشرايج انتي
سهيله:
مسرع ما تغير رايك
عبدالعزيز :
علشان سهالي امهد كل شي عسب اوصل لقلبها
سهيلة :
لا تزودها خلاااص عبدالعزيز
عبدالعزيز:
لا حول وانا قلت شي وبعدين من يوم ما رديتي عليه انج بتوافقين ترمسيني من رسالة الايميل وانا مستخف بصراحه صابني يأس بتأخرج
سهيلة فرحانه بهالرمسه :
ما اصدقك
عبدالعزيز :
شو تبيني اسووي علشان تصدقيني
سهيله :
امممممممم ما شي خلااااص بصدقك هالمره بكيفي
عبدالعزيز :
جنه فيج غرور... بس على قلبي عسل
سهيلة :
من حقي اغتر وانا سهيلة
عبدالعزيز اطفر من عنطزت هالياهل ماله بارض لها خلاص بيطلع من النت :
الغاليه سمحيلي امايه تزقرني تباني اوديها المستشفى
سهيلة :
ما تشوف شر سلم على عمتيه
عبدالعزيز من شاف الجمله الاخيرة وهو ناقع ضحك وصارت امايه عمتها بعد صدق ياهل مقصه هذا وانا اول مره ارمسها بعد درت اني ولد لا حول مصدقه اني باخذها واول مسويه عمرها حاله ورزه وهز راسه من كثرالضحك وقال: عيل انا اتزوج من هالاشكال صدق يهالوووه الله يعينا:
السلام يوصل مع السلامه الغالية
سهيله :
في حفظ الرحمن
.
.
الساعه اربع ونص العصر يالسين وهو حرمته في الصاله يسولفون عن سيرة باجر للمزرعه
ام حمد : زين يا عبيد من متى ما التمين وياهم
ابوحمد : يالله الله يسامح مشاغل الدنيا
تدخل اليدة اللي تساعدها فكتوريافي المشي : انتوا اللي سويتوا والا كل الناس عندها مشاغل وشركات ما قطعوا صلة الرحم
ام حمد :يالله يا عمتيه تراهم هم القاطعين مب عبيد
اليدة تيلس عدالهم : عاد تبى تحامي عن ريلها بكله أنا
ابوحمد يضحك : لازم امايه بتحامي عني مب ام عيالي
ام حمد استانست انه دافع عنها : الله يخلي لي ولعيالي يا رب
اليدة استغاضت :اشتغلت العياره عندها عوذ بالله .......وتصد على ولدها : ها جهزتوا حق روحت باجر والله اني فرحانه من زمان ما رحنا المزرعه وزادها زود هالمره عيالي فديتهم كلهم بيروحون
ابو عبيد استانس من رمست امه : ربي يخلج لنا يا الغالية ولا يحرمنا من الويه
اليده فرحت : ويه فديت وليدي لا خلا وعدم
ام حمد اطالع ريلها : بروح اتجهز ابى اسير السوق انا وسهالي تبى تشتري للمدرسة اغراض
ابوحمد يطالعها : مب من عادتج تروحين ويها يوم تبى اغراض للمدرسة اطرشينها ويا حد من اخوانها شو طاري عليج والا مواعده ربيعتج
ام حمد :ههههههههه الاثنينه جان تبى الصدق
اليدة : يلسي جابلي بيتج بدال ما تروحين ويا رباعتج ربعبهن ناقه قولوا اميييييييين
ابوحمد :هههههههههههههههههههه امايه الله يهديج خليها تبى تفي عن عمرها
ام حمد عصبت بس هيه متعوده هالرمسه من عمتها وعاشت عندها فوق 25 سنه فطنش ولا تزعل وبعدين غايه حرمت عمها : الله يسامج عمتيه ......وتنش واقفه : بروح اخلي سهالي اتجهز .........وطلعت من الصاله
ابوحمد يتقرب من امه : زين امايه جذيه زعلتيها
اليدة تاشر بايدها : اونه زعلت لو زعلت ما بتقوم تزهب
ابوحمد : الله يهديج يا امايه
اليدة : ودر عنك الله يهديج والله يهديج متى ولدك بيعرس صك الثلاثين وهو بعده
ابوحمد عاقد حياته : منووو حمد
اليدة : هيه حمد منوو غيره خليفه وعرس واللي مبارك مانبى نغرب بنات الخلق ويبتلشن به
ابوحمد : شو تبيني اسويبه اضربه اقوله لازم تعرس تراها هو لحد الحين ما طرى سالفة العرس
اليدة : عيل حرمتك شو خانتها اشفيها ما ترمسه ....والا اقول خله ايي من دبي انا برمسه نبى نفرحبه عاد الفرحه بحمد غييير
ابوحمد استانس يدري بأمه شكثر تحب حمد : يا رب نفرح بحمد ومبارك وحور وسهيله ونشووف عيالهم
اليدة ترفع ايدها : آمييييييييين
.
.
.
اطالع ساعتها صارت الساعه سبع المغرب وهو من يوم طالع الصبح ما رد وتسويله وما يرد على تيلفوناتها تعبت من التفكير وخافت عليه وايد
شوق تلعب بالعروسه : ماماه
منى معصبه : شو تبين
شوق:ابى اثير عند همدووه
منى اففف مالها بارض: عمج اليوم مب هني رايج دبي
شوق: بئيد
منى : هيه بعيد سيري لعبي ويا كرتين شوواقي اروحي طفرانه سيري
سهيله تدخل عليها : السلام عليكم
منى : وعليج السلام هلا سهالي قربي
سهيله تروح عند شوق وتبوسها : هلا بدلوعة عموه
شوق فرحانه : ثهلوووه
سهيله تشلها : اففففف دبه بتكسرين ظهري
منى تصد عليها : انتي الثانية ذكري الله بتحسدين البنت
سهيلة :هههههههههه ول كلتني ماشاء الله يا ابووويج شوي شوي
وتنزل حور عقب ما حبتها وسارت صووب حرمت اخوها
منى اطالعها : مب من عوايدها سهيله تزورنا ها شطاري عليها
سهيله : ما شي ملانه ويت والا تبين اطلع
منى : سخيفه انا قلت جذيه شخبار الدراسه
سهيله بتافف : دخيلج منووه لا تطريها
منى : مب تووج يايه من السووق شوو اللي خلاج تملين
سهيلة : وين رحت الا المكتبه ورديت وراحت امايه عند خالتي أمنه
منى : هيه
سهيله اطالعها بتشكك منى مب على بعضها : اشفيج
وشووويه ويدخل خليفة والابتسامه شاقه الحلج : السلام عليكم
منى وسهيله : وعليكم السلام
خليفه : وانا اقول بيتي منور والشعاع واصل اخر الشارع طلعت ست الحسن والجمال مشرفتنه
سهيله متشققه من مدح اخوها وتروح صوبه تسلم : منور باهله
خليفه يسلم عليها صد على حرمته اللي مسويه له طاف : هلا بأم عبدالله
منى ما ردت عليه
خليفه يتقرب : اشفيه الحلوو زعلان
منى اطالعه متى ترمس جدام سهيله :خليفه اسكت عني الحين لاني معصبه وبتسمع رمسه ما بتيوز لك
سهيله شافت انه وراهم سالفه ويلستها وياهم مب حلووه انا شارده من الملل يت للصدعه الله يعينا بصراحه :انا بروح اسمحولي
منى : افا اشفيج سهالي تعالي قعدي ويانا تووج يايه
سهيلة تروح صوب شوق: بشلها ويايه
خليفه يعرف انها معصبه انه تاخر ولا رد عليها يطمنها ويبى يراضيها : برايج شليها
سهيله تطلع هيه وشوق : مع السلامه
خليفه ومنى : في حفظ الرحمن
خليفه يصد على منى : منى اشفيج سوري حبيبي ادري بس انشغلت
منى توقف: مب حجه هذي خليفه ما تقول عندي حرمه بطمنها مودرنها من الصبح وراد المغرب
خليه : تراني مب مودرنج في سيح مودرنج في بيت معززه مكرمه شو تبين
منى مستغربه : هذا ردك هذا اللي قدرت عليه
خليفه يقوم وتنهد : مناووي لا تكبرين السالفه والله اني تعبان وسوري حبيبي خلاص عاد
منى ساكته وماترد مسكها خليفه من ايدها وحضنها
.
.
.
المكان : دبي
حور اطالعه : خلاص الغالي لا اتم جذيه قلت رضيت رمسني عاد
حمد يصد عليها : واونها متوسطه عند سيف لو مب هو
حور: خلاااص تعبت من هالكلمه اليوم ســــــوري
حمد : احسن انذلي شووي علشان تثمنين اللي تقولينه
حور تبى تغير السالفه : باجر بنروح كلنا المزرعه
حمد عرفها بس حتى هو راسه عوره من هالسالفه : هيه ان شاء الله
حور تبى تعرف أكثر عنهم : اقوول حمد ليش ولاد عمي ما يزورونا ولاايووون بيتنا
حمد يطالعها : ليش
حور : ياربي بس سؤال صدق ليش
حمد : منو قالج تراهم يزورنا بس دومهم في الميلس ما يدخلون داخل
حور: اهاااا .....وردت تسال: مثلااا باجر بنشوفهم
حمد يصد عليها عقب يطالع دربه : شو سالفتج بهالاسئله فهميني
حور: بصراحه ابى اعرف يوووم اشووفهم شو يكون موقفي اتغشى اسلم او لا
حمد يبتسم : تعرفين نحن من زمان ما التمينا رباعه تقريبا ست سنين وخاصه انا لاني كنت مسافر ادرس برا البلاد كانن بنات عمي صغار نشوفهن بس بعد ما علاقتنا ضعفت شووي ما نشوفهن الا خطافي ومتغشيات
حور: اها ان شاء الله ترد العلاقه اوكيييه يعني عادي ما نتغشى
حمد : انتي اتخبرج شو سالفتج ويا الغشى
حور: بصراحه ما احبه اهم شي عندي متحجبه وشعري مب برا وبعدين من زود الجمال يعني اتغشى
حمد :ههههه الله وأكبر على التواضع الحين انتي مب حلوه لنا الله
حور تشققت من الفرحه من رمست اخوها
حمد : اهم شي تكوني متحجبه بس بتتغشين في السوق غصبن عنج
حور: مب مشكله بتغشى بس انا ما احب الرسميات بين الأهل عسب جيه سألتك هم ولاد عمنا ونحن متحجبين ومتحشمات ما يحتاي نتغشى
حمد سكت ما رد عليها
حور تبى تسأله : حمد
حمد : ما خلصني اني رضيت اشعندج بعد
حور مستانسه يوم عقب يوم تزداد علاقتها ويا حمد وخاصه هالروحه استوت اكشنات وايد اثبت انها تحبه ومتقبلتنه كأخوو : استحمل عاد في خاطري اعرف عنكم اكثر
حمد يطالعها وابتسم يدري علاقة أمه وسهيله بحور مب ذاك الزود منو بيخبرها : تفضلي
حور متردده : انته ليش ما عرست
حمد :ههههههههههه شو محصله لي عروس
حور: لا بس اسأل يعني ماشاء الله قلت مال وحلاه وهيبه ومتعلم وبعد برا ولحد الحين ما عرست وفوق هذا خليفه اللي اصغر عنك معرس
حمد : بصراحه ما عندي سبب مقنع يمكن عايبتني العزوبيه اونلي ذات
حور مبتسمه : حلوووو
حمد مستغرب : اللي هو
حور تلف بكبرها عليه : يعني ما عندك سبب او متعقد بس جيه... انا اللي بدورلك العروس وبختارها
حمد :هههههههه يوم ابى اعرس بيج اوكيييييييه
حور تبتسم : اتفقنااا.............وترد تسال : سؤال ثاني منى تقربلكم ومن اختارها لخليفه
حمد : يا هالاسئلة المهم منى معرفة اهل ومنوو اختارها امايه بس تبين الصدق خليفه شافها مره وحده وهيه يايه بيتنا فاصر انه يباها ومحد عارض لانها بنت حشيمه وما تنرفض
حور: حلووووو بصراحه فتنكه شافها وعيبته
حمد : حووووووو شو سالفتج انتي
حور والابتسامه تشق الحلج : حمد
حمد : تعرفين شي عفت اسمي
حور: بعترف اعتراااااف خطير
حمد :الله يستر من اعترافاتج
حور: حبيتك وايد ومستانسه انه عندي اخوو مثلك حتى حشرتهم اليوم من كثر ماامدحك لين ما ملوا مني
حمد ابتسم ابتسامه حلوووه وصد يطالع دربه حور اللي في قلبها على لسانها ما تخبي شي وهو بصراحه استانس من رمستها انه احتل مكانه في قلبها اتذكر غيرته من سيف وهز راسه ولف عليها حصلها مغمضه عينها قال في خاطره وايد اللي شفتيه وانتي صغيره الله يسامح ابوووي اللي حرمنا منج حتى انا بصراحه دشيتي قلبي بسرعه وارتحت وياااج وتقربت منج اكثر وتعلمت معنى الأخووه عندج يوم شفت علاقتج ويا سيف ثارت فيني مشاعر فضيعه وخاصه من روحات الويكند صوب دبي وارتحت لاهلها صدق شفت الطيب عندهم والكرم من عقبهم والحياة في بيتهم عكس بيتهم اللي اشبه بالفندق للرقاد .....
